‘Ia au ‘i te tahua parau ‘āpī Outremers360, ‘ua fāri’i ‘o Louis Mapou ‘e ‘o Moetai Brotherson ‘i te tītau-manihini-ra’a ‘a Emmanuel Macron. Tei Paris te peretiteni nō te fenua Taratoni ‘i teie mau mahana nō te tūatapapa ‘i te papature ‘e arata’i ‘i tōna fenua, ‘āre’a ra nō te peretiteni nō Pōrīnetia Farāni, ‘e tāpae atu ‘ia ‘a mahana maha nō te mau farereira’a tei tarēnahia ‘e tō te Hau nui. ‘E riro ra, ‘e’ita te peretiteni nō te fare ‘āpo’ora’a rahi nō Wallis e Futuna, Munipoese Muliakala ‘e ‘āmui atu ‘i roto ‘i teie tere.
‘Ei fa’aha’amana’ora’a, ‘i roto ‘i te pupu mā’iti nō Farāni, ‘e 6 taure’a hā’uti nō te aramoana. ‘I rotopū ‘ia rātou ‘e 4 nō te moana Pātifita, nō Wallis e Futuna ihoa ra ‘e te fenua Taratoni. Rahi te hui mana nō te aramoana, nō te pae ‘ōteānia ‘e tīa’ihia ra ‘i te ‘ōro’a ‘iritira’a nō te harura’a ‘āu’a fa’ahorora’a pōpō ‘e tupu ‘i te fenua Farāni.
‘E tū’aro auhia te fa’ahorora’a pōpō ‘i roto ‘i te moana Pātifita, ‘i Wallis-Futuna iho, hō’ē ā huru nō rātou ‘e ora ra ‘i te fenua Taratoni ‘e Farāni. ‘Ua tu’i ato’a te ro’o ‘o teie nei hā’uti ‘i te fenua Fitī, Hāmoa, Tonga ‘e ‘i Aotearoa. Nō te fārereira’a mātāmua, ‘e ha’utira’a ‘i rotopū ‘i te pupu All Blacks ‘e tō te fenua Farāni tei tarēnahia.
