Hō’ē matahiti ‘i teie nei tō te metua varua Christophe ‘ōpanira’a ‘i te tātetara ‘i muri mai tō te hō’ē mero nō te pāroita tāparahi ra’a hia ‘e te hō’ē ta’ata ‘ōvere. ‘E ‘ua pi’i ‘i te ‘oire nō papeete ‘e te fenua ia arai te mau ‘ati ‘i roto ‘e ‘i rapae ‘i te tātetara. ‘Ua rave hia nā te ‘oire ‘i teie tāpura ‘ohipa, mā te ha’apūai ‘i te mau hi’opo’ara’a ‘a te mau mūto’i, ‘ia ‘ore te ta’ata ‘ia ta’oto ‘aore ra ia fa’aea maoro ‘i te hō’ē vāhi ‘o te ‘oire pū.
« ‘I tō rātou ti’avarura’a ia mātou, ‘ua haere mai te mau mūto’i, te mau pereo’o ‘e tā rātou mau ‘urī. ‘E ua parau mai ia mātou ‘e tāmā rātou ‘i te tātetara. ‘Ua parau ato’a ma ‘e tāpapa ‘i te mau pū fa’ari’ira’a, teie ra ‘aita te mau pū fa’ari’ira’a ‘e fa’ari’i nei ‘i te mau ‘urī » te reo teie ‘o te hō’ē ‘o te feiā ‘ōvere nei nā papeete.
I Fare Ute, te ‘ōpua ra te ‘oire ‘e te fa’aterera’a hau nō te autaea’era’a ‘e fa’ari’i ‘i te hō’ē fare maeha’a ‘ei vāhi fa’ari’ira’a ‘i te feiā ‘ōvere, ‘i te pō.
« Te vai ra te tahi māna’ona’ora’a ‘i roto i te tāvana ‘oire tae noa atu te fa’aterehau ‘e ha’apa’o nei te parau nō te tōtiare nō te fa’ari’ira’a ia rātou i Fare Ute ihoa ‘i te tahi ra vāhi huru rarahi ri’i, ‘e nehenehe ‘e fa’anaho te tahi tāpura ‘ohipa nō rātou » te reo fa’ahiahia ‘o Rémy Brillant te fa’atere nō te mau piha ‘ohipa ‘i te fare ‘oire nō Papeete.
Mai te mea ‘e’ita ‘e taui, ‘e fa’ari’i hia te feiā ‘ōvere ‘i teie fare maeha’a ‘i te mahana ‘ōro’a nō noera.
