Nō teie fa’anahora’a, 400 moiha’a tei fa’aineinehia e ana. I te fenua ‘Auterāria, i reira ‘ona e ora ai, te tā’ato’ara’a o te mau tauiha’a i te hāmanira’ahia e utahia mai ai nā ni’a i te pahī i Tahiti nei.
Piri i te pae ‘āva’e tōna ‘ohipara’a, mai te ‘imira’a i te repo e au, fa’ahuru ‘ē ia na e pēni atu ai i te hōho’a i ni’a iho. Te mau tiare i te mea fa’a’ohipa-pinepine-hia e Myriama Prokop nō te fa’a’una’unara’a i te mau ‘āu’a, te mau ‘āu’a rahi, te mau merēti, te mau vaira’a pape e tae atu i te vaira’a fāfaru. « Mea pūai roa te hāu’a o te fafaru, i tā’u hi’ora’a nā te mau fa’a’una’una i pēnihia i ni’a i te vaira’a e tāmārū i tōna hau’a », i te reo ‘o Myriama Prokop.
Hitu matahiti tōna fa’aeara’a i te hāmani i te mau tāo’a, mai tōna ihoa ho’ira’a i ‘Auterāria. I tōna hō’ē haerera’a mai i Tahiti nō te tau fa’afa’aeara’a, nā tāna iramutu ‘o Heremonana Buchin i tūra’i ia Myriama ‘ia fa’a’ohipa fa’ahou i tōna ‘ite. ‘Aita ‘ona i mana’o e ho’i ‘ōhie mai te ravera’a.
« Mea tāmata nā mua teie ‘ohipa », e te ‘ata ‘ia fa’ati’a ‘o Myriama. « I te ‘āfarora’a, niuniu mai nei au ia Heremoana, ‘ua reva. Mai te reira ihoa taime tō’u ha’amatara’a, ‘aita e fa’aeara’a e pō atu. Mai te huru ra, ‘aita tō’u rima e hina’aro i te fa’aea. Te ‘oa’oa nei au te mau ‘ohipa ato’a i mātara mai ».
I te fenua ‘Auterāria tō Myriama Prokop ha’api’ira’a i te hāmani i te tao’a mā te fa’a’ohipa i te repo tunu. Pūai atu tōna ‘aravihi nā roto i tōna mau tere nā te ao. ‘Ua ora maoro i te mau fenua ‘Ātia e ‘ua hi’o i te huru ravera’a a terā e terā nūna’a. Nō te pāpa’ira’a i te mau hōho’a, e ‘ite terā nō roto mai i tōna metua tāne.
I roto hō’ē ho’ora’a poe tōna ho’ora’a i tāna mau tauiha’a mātāmua, tau matahiti i teie nei, mea fa’a’una’unahia i te mau poe. I ni’a 30 ‘ahuru tao’a, ‘ua mahere tā’ato’ara’a. Nā te reira ato’a i fa’afa’aitoito ia na e tāmau ā.
E tupu te fa’a’ite’itera’a a Myriama Prokop tae atu i te 5 nō ‘ātopa i Pira’e i te aroā Tefareri’i i te piha fa’a’ite’itera’a Hereany Pearl.
