Hou te fa’arevara’a i teie pō monire, ‘ua fāri’i ‘o Mata IHORAI ‘ia André Vohi, te ta’ata fa’aineine i teie hoera’a atea, i roto i te ve’a nō tāpati piti ‘āhuru mā pae (25) nō fepuare 2024.
‘Ua hi’opo’ahia na ‘outou e te taote. ‘Eaha te parau hope’a a te taote, nehenehe e haere e hoe ananahi pō?
Te reira, ‘ua ineine mātou, te fa’aineinehia ra te mau tuha’a hope’a…hi’opo’a fa’ahou te mau taure’are’a, hi’o te va’a, te mōrī, mā’iti te ‘ū, ‘ute’ute anei matie anei…
André, e ono taime ‘outou i te fa’aineinera’a e hoe i te pō. ‘Eaha te huru o tā tātou mau ‘aito, ‘ua ineine?
‘Ua rave a’e na mai tō tātou mau metua i teie hoera’a, te ha’amana’o ra paha vetahi i teie va’a « Teremata’i » i te matahiti hitu ‘āhuru mā pae (75). ‘O Gabilou mā i terā ra tau ‘e tae noa atu i tetahi feiā hoe nō Teoropa’a e haere roa i Huahine. Nō te aha ? Nō te fa’a’ite e nehenehe te va’a ono nō terā tau e haere ato’a nā tua. Nō te mea i tera tau, i te heiva e tupu ai te hoera’a va’a. Te ‘ohipa tā’u e rave nei i teie mahana, te ‘āpe’era’a ia i tā rātou ‘avei’a. ‘Ua fa’a’ea noa te tau’ati i roto i te tairoto, i teie mahana te ‘āpe’e rā mātou i te fa’anahora’a ‘a te mau rū’au. Terā te hōhonura’a parau i teie pō, nō te aha mātou e haere roa ai i Huahine.
Piti matahiti tō ‘oe fa’aineinera’a, piti matahiti tō ‘oe ‘imira’a i te feiā ‘āpī, ‘e’ere terā feiā ‘āpī te ha’amatara’a mai e mau aito nō te va’a. Feiā ‘āpī nō roto mai i te mau aroa, ‘ua ‘ite ihoa tāua te fa’anahora’a o te orara’a o te mau aroa. ‘Ua ‘itehia te tahi tauira’a, te feiā ‘āpī i ni’a te ferurira’a teie mahana?
Haere roa ihoa ia tāua i ni’a i tā tāua fa’anahora’a « TNTV va’a festival ». Mai te peu, te ha’amana’o rā ‘oe, ‘ua tūra’ihia te mau aroa ‘e te mau taiete, terā ia te tumu. ‘Ua ha’amata a’e na a piti matahiti, te tīti’ara’a o te mau taure’are’a nō te mau aroa i roto i teie fa’anahora’a TNTV va’a festival nō teie ia ‘ōpuara’a haere roa i Huahine nō te ha’afaufa’a i teie faura’o tō tātou, te tau’ati. E māuruuru i te atua, tauturuhia mātou e te pū AFD ‘e tae noa atu i teie fa’anahora’a Heiva Nui. ‘Ua hi’o mai rātou teie ‘ōpuara’a, e turu roa mai nei. I noa’a mai ai te mau taote, te mau iati, roa’a mai nei te tauturu nō te ‘aufau teie tere nō mātou.
‘Ia tupu maita’i terā tere. Te vai ra te taote i muri ‘ia ‘outou, te poti ‘āpe’e?
Mea ‘ohipa rahi te fa’anahora’a. ‘Aita e taote, ‘e’ita e haere. E maha poti. E piti ‘āhuru ma piti (22) mātou pāuroa, ‘āhuru mā va’u (18) taure’are’a.
‘Eaha te fa’anahora’a nō ananahi pō ?
Ta’oto maita’i teie pō, hi’o atu ai ananahi. ‘Ua ineine pāuroa mātou. Te ani nei au ‘ia Pōrīnetia, ‘ia turu mai i teie fa’anahora’a, nā roto anei te pure, te māna’ona’o. I te mea ho’i e, ‘eiaha ‘outou e hi’o noa ia André Vohi ‘aore ra teie mau taure’are’a. Hi’o ‘outou teie ia faura’o, te ha’afaufa’ahia ra te parau nō te tau’ati, e hi’o ‘outou te mau taure’are’a e hoe atu i teie tau’ati e te ātea nō te fa’atu’ati fa’ahou te parau nō te va’a tau’ati tua, te parau nō te mau aroa, te mau taure’are’a ‘aita e ha’apa’ohia i te mau taime ato’a. E teie ‘ōpuara’a nō te Heiva nui tū’aro.
Terā ia tā’u i ani atu ia ‘oe ‘araua’e ra, tera mau taure’are’a, ‘ua ‘ite ‘oe i tetahi tauira’a tō rātou huru. ‘Ua ‘ite ho’i ‘oe te mau taure’are’a, parau ana’e atu ‘oe parau ato’a mai ‘ia ‘oe. ‘Ua ‘ite ‘oe tetahi tauira’a?
Ni’a iho noa i te tīti’ara’a, ha’amatara’a piti hānere toru ‘āhuru mā toru (233) toera’a mai ‘āhuru mā va’u (18), terā ‘āhuru mā va’u nehenehe parau e, pu’era’a ‘aito. Pa’ari te upo’o, ‘aita e ri’ari’a, terā te tauira’a. ‘Ua ara rātou, ‘ua ‘ite rātou, ‘aita ‘o Steeve mā, ‘aita ato’a ‘o Kevin, ‘aita ato’a ‘o Lewis i rave a’e nei teie fa’anahora’a, nehenehe rātou e rave. ‘E’ere te fa’ahapara’a teie, fa’ateiteira’a ia rātou. Tera te tauira’a i roto i te orara’a. E au ra e, terā ‘āhuru mā va’u taure’are’a i matara mai, nehenehe paha rātou e haere i mua. E, e fa’aite ato’a i tō piha’i iho mai, e nehenehe ato’a rātou e haere i mua.
André, ‘aita ‘oe e rave tā ‘āfa te ‘ohipa, te aura’a, terā hoera’a nō ananahi, mea tāviri pāuroa hoa ia te hōho’a fa’aineineine mai nō tera piti ‘āhuru mā maharaa (24) o te matahiti tā tāua ‘āfata teata?
Te reira, tai’o noa, terā ihoa ‘āva’e tiunu, mai tā ‘outou i matau, pauroa te mau matahiti e ha’apūroro vau hō’ē fa’anahora’a ta’a’e, terā ia tere. E ‘ite pauroa ‘outou te ‘ohipa e tupu i roto i teie hoera’a. Tauturu mai…
Nō reira, ‘aita atu e poro’i, fa’aitoito e ia maita’i tō ‘outou tere te mau ‘aito.
