‘Ua fa’aoti te fa’aterera’a hau fenua e ‘ia fa’aha’amana’ohia te tau o te Matari’i i ni’a mai te matahiti 2025. I roto i tāna rurura’a hepetoma, ‘ua ha’amanahia te 20 nō nōvema ‘ei tāpati farāni nō te mono atu i te 29 nō tiunu, tāi’o mahana i ‘anetihia ‘o Farāni ia Tahiti i te matahiti 1880. ‘E’ere a tahi nei teie tāuira’a a fa’ahitihia ai e te mono peretiteni Eliane Tevahitua, inaha i te hi’ora’a a te Tāvini Huira’atira e « mahana hevara’a » terā.
Nō te Tāvini Huira’atira e tūea te 20 nō nōvema i te fa’ahanahanara’a « i te matahiti ‘āpī a te nūna’a mā’ohi ». I reira ato’a ‘o Pipiri mā e hiti mai ai, tāpa’o nō te ‘ōmuara’a o te tau ‘auhune i te fenua nei.
Nō te fa’aterera’a hau fenua, hau atu i te tau ‘auhune e taime ato’a terā nō te fa’ahanahanara’a i te « ‘ōro’a o te tama o te o atu i roto i te pu’etau ha’api’ira’a ia riro mai ‘ei ta’ata ti’amā« .
I roto i tāna parau fa’a’ati, te fa’aha’amana’o ato’a ra te hau fenua e « ‘ua ha’amatahia teie ‘ōpuara’a i te matahiti 2000 ra, oia ho’i ‘ia monohia te 29 nō tiunu e te 20 nō nōvema, ‘aita ra te mau mero nō te Fare rau maire i fa’ari’i i tāua tau ra. I roto i tana mau tuatāpapara’a nō te 20 nō tiunu 2006, te fa’a’ite ra te Fare rau maire e ‘aita te tā’āto’ara’a o te mau mero e pāto’i fa’ahou ra ‘ia fa’ahanahanahia te ‘ōro’a o te fenua nei i te tāi’o mahana ‘ē atu i te 29 nō tiunu. ‘Ua ani rātou ‘ia tāpe’ahia te hitira’a ‘o Matari’i mā ».
