Fa’aora te ta’ata tei fifi i ni’a i te tai, pāheru te ra’au ta’ero i ni’a i te pahī ‘e pāruru tō tātou mau ‘ōti’a moana, te tuha’a rahi a te nu’u moana iō tātou nei. Matahiti 2024 ra, 408 pahī rāva’ai tei ‘itehia i te tāi’ara’a i te hiti o tō tātou nei ‘ōti’a moana. ‘Aita ra i tomo roa mai, mai tei ‘itehia i te mau matahiti ma’iri a’e nei.
E mai te mea, tei rōpū tātou i te moana Pātitifā i ni’a te rēni fa’a’ohipahia o te feiā tapiho’o nei i te rā’au ta’ero mai Marite ‘apato’a tere atu i ‘Auterāria ‘e maoti te rurura’a rahi a te mau nu’u moana nō te ara tei fa’atupuhia i Tahiti a piti ‘āva’e i teie nei tei ha’apūai i te mau tā’amura’a e te mau hau ‘e’ē i mua i te tapiho’ora’a rā’au ta’ero, 524 kiro « cocaïne » tei haruhia i te ‘āva’e tītema ra i ni’a hō’ē pahī rāva’ai Pāniora i te pae Tuha’a pae mā.
« Ua hina’aro mātou e hi’o pāpū i te mau pahō fa’atoro niuniu a Google. Hi’o pāpū ato’a i te mau pahī rahi, hō’ē tei tae mai i tō tātou fenua i teie matahiti. E va’u (8) tauatini horopatete e utahia e ana. Hi’opo’a ato’a mātou i te mau pahī ato’a ‘aita tā rātou e ‘ohipa i roto i te ‘ōti’a moana » Eric Sptiz, te tōmītera teitei.
« Piti (2) haere roa e toru (3) ‘ōti’a moana i pīha’i iho i tō tātou iho ‘ōti’a moana, e au maita’ihia e te feiā rāva’ai nō rapae. Pi’ihia teie mau vāhi « Ice Pocket ». ‘Aua’e tītau-noa-hia ia rātou te parau fa’ati’a nō te ‘ohipa rāva’ai. Tera tā mātou e hi’opo’a maita’i. Ārai mātou i tō tātou ihoa ‘ōti’a moana nā mua roa, ‘e i muri, ārai ato’a i tō rapae » Guillaume PINGET, tōmana teitei nō te nu’u fa’aehau nō Pōrīnetia Farāni.
Rahi ato’a te mau pahī uta rātere, ‘ei maita’i nō te terera’a faufa’a, tera rā tītauhia ‘i te nu’u ia āra maita’i te mau reini ravehia ‘e teie mau pahī nā te mau pae tuamotu mā.
I te pae o te mau rāve’a, ‘ua tae mai te manuā Teriieroo a Teriierooiterai, e te tīa’ihia ra te mau manureva ‘āpi faito « Falcon 200 » nō te mono te mau manureva « Gardian ». « Te faufa’a ‘o teie manureva « Falcon », e nehenehe ‘ona e rere i te pō. Mea faufa’a ‘ia tae te tau ua ihoa ra nō te ti’i te feiā i mo’e i roto i te pō. Rāve’a faufa’a teie nō Pōrīnetia Farāni ‘e nō tō tātou mau taea’e ato’a ‘e ‘ati nei ia Pātitifā. Rātou ato’a te fifi nei i mua i te ahu o te reva. ‘E’ere noa te parau nō te faufa’a rau o te moana, teie tā mātou e ha’apa’o nei, te faufa’a o te ‘ohipa a te hau nui i te ao nei, nō te hi’opo’ara’a moana e te ‘arora’a i te tapiho’ora’a rā’au ta’ero » Guillaume Pinget, tōmana teitei nō te nu’u fa’ehau nō Pōrīnetia Farāni.
Matahiti i ma’iri a’e nei, 430 taime tō te pū mā’imira’a a te JRCC tonora’a tāna mau rāve’a, tōna aura’a, hau i te hō’ē pi’ira’a i te mahana tāna i pāhono atu. Noa atu teie mau rāve’a e 9 ta’ata tei fa’aru’e i tua. Te ti’aturi nei te tōmitera teitei i ni’a i te fa’aaura’a roro uira pi’ihia AML, Advanced Mobile Locative, ia ‘ore teie mau ‘ati pohe ia tupu fa’ahou i tō tātou nei fenua.
« A tere nā ni’a i te moana, fa’aāra tō ‘outou mau ‘ūtuāfare. ‘Āfa’i ato’a te niuniu ‘āfaifa’i. Rāve’a teie nō te fa’a’ite mai te vāhi tei reira ‘outou. I te ‘āva’e tenuare ra, ‘ua ha’amau mātou i te tahi fa’aaura’a roro uira, nāna e fa’a’ite i te vāhi niuniuhia mai e te ta’ata e fifi nei i ni’a i te mou’a āneri ‘aore ra i ni’a i te moana. 20 metera te ‘ā’ano o te mā’imira’a » Eric Spitz te tōmitera teitei.
‘Ua itehia o Pōrīnetia mai te fenua ineine roa a’e i mua i te mau fifi e ‘itehia ra i ni’a i te moana. ‘Āva’e tiunu i muri nei e tere atu te hau nui e te hau fenua i te ‘oire nō Nice nō te rurura’a rahi i ni’a i te pārurura’a o te mau ‘ōti’a moana, te UNOC.
