Bora Bora te fenua i mā’itihia i teie matahiti e te ‘Ētārētia nō te Autahi o te Mesia nō tāna rurura’a rahi. Te tumu, i reira te fa’a’ohipara’ahia te mātini nō te taui te miti ‘ei pape mā. Hau roa atu, te ahu ‘o te reva, tāna tumu parau rahi. Taime teie nō te fa’aineine i te mau mero nō te ‘ētārētia i mua i te mara’ara’a o te miti ‘e te ahu o te paraneta. « E māna’ona’ora’a rahi te reira, parau mau, ‘aita mātou i ‘aravihi roa i roto i te mau rāve’a e tano ‘ia rave. Teie nei ra, e hina’arohia te tahi mau rima fa’atupu nō te tauturura’a te reira vāhi ‘ia tae atu i taua taime ra. Nō reira, e ‘ohipa ia nā mātou te ‘ētārētia ‘ia ha’aputu, ‘ia feruri, ‘ia parauparau ia rātou. ‘Ia fa’aineine teie mau tino. ‘Ia nehenehe e fa’aō i roto i te tahi mau tāpura ‘ohipa », i te reo ‘o Marcel Maiau, hō’ē ‘o te mau ‘orometua nō te fa’aro’o Autahi nō te Mesia.
Nō teie taime, te pe’ape’a nei tō te ‘ētārētia i te mara’ara’a o te miti i te pae Tuamotu. Tā rātou rāve’a, te ‘imira’a ia i te mau tuha’a fenua e tano i te mau pae Mātuita mā, nō te tauturu i teie huira’atira ‘ia tupu noa atu te fifi.
E mai te mea, te tamari’i te u’i nō ananahi, ‘ua mana’o te mau ti’a fa’atere o te fa’aro’o Autahi nō te Mesia e nati ia rātou i te tumu parau faufa’a o te ahu o te reva. « E ha’a mātou i ni’a i te pārurura’a i te mau hāmani maita’i a te Atua. Nāfea ‘ia riro mai ‘ei ta’ata aupuru i te natura, te tī’a’aura’a i te mau pehu ānei ‘e ia ara ‘i te mau ha’amau’ara’a mai te fa’a’ohipa faufa’a ‘ore noa ‘i te uira ‘e te vai nātura….’e nâ roto i teie mau rāve’a, e ha’api’i mātou i tā tātou u’i ‘āpī » Nova Tama, ha’api’i ‘evaneria nā te mau tamari’i.
E tupu teie rurura’a matahiti a te fa’aro’o nō te Autahi o te Mesia, mai te 16 e tae atu i te 20 nō tetepa i te motu nō Bora Bora. 700 mero e tīa’ihia i Vaitape.
