Nō teie nei nā nōminora’a ‘āpī, ‘ua haere roa mai ‘o Moetai Brotherson e fārerei i te mau rave ‘ohipa. ‘O Karl Tefaatau ‘e ‘o Yves Haupert te mau ra’atira ‘āpī o TNTV.
« Te vai ra te tahi tū’atira’a i rotopū ‘ia rāua. Karl Tefaatau tei matau maita’i i te parau nō te roro uira, te natirara, teie mau rāve’a ‘āpī ‘e te vai ra ‘o Yves Haupert nō roto mai ‘ona i te mau piha pāpa’i ve’a. Mana’o mātou ‘e ‘ia tā’atihia rāua terā tahi rāve’a pāpū », i te reo ‘o Moetai Brotherson.
Te mea pāpū, ‘ua vauvau ato’a mai na nā ti’a e piti nei i tā rāua mau tāpura ‘ohipa i mua i te mau rave ‘ohipa i te hepetoma i ma’iri a’e nei. 42 rātou tei hōro’a i tō rātou ti’aturira’a ‘i tō rātou ra’atira tahito, ‘inaha ‘ua ha’a mai na ‘o Yves Haupert i TNTV mai te matahiti 2007 ‘e tae atu i te matahiti 2013. ‘Āre’a ra ‘ia Karl Tefaatau, e 9 reo tei rōa’a ‘iana, teie rā i te hi’ora’a a te tōmite fa’atere, teie te ra’atira tano nō te arata’ira’a ‘ia TNTV i roto i te mau rave’a ha’apūrorora’a ‘āpī.
‘Ua fa’atupu nā nōminora’a e piti i te uiuira’a i roto i te mau rave ‘ohipa, i te taime a anihia ai i te taiete e fa’aiti i tāna mau ha’amau’ara’a.
