E fa’a’ohipara’a teie i te fa’a’otira’a a te mau mero ‘āpo’ora’a rahi nō te 6 nō tiunu 2024, e fa’aō i te tahi mau arata’ira’a faufa’a nō te taime fa’afa’aeara’a a te mau metua tāne i te tau fānaura’a nō te fa’ari’i te tama fānau ‘āpī, nā reira ato’a nō te mau fa’anahora’a rau i roto i te mau pū ‘ohipa a te hau nō te fenua nei.
Nō reira, 11 mahana fa’afa’aeara’a ‘aufauhia e hōro’ahia i te mau metua tāne, rave ‘ohipa nā te hau, nō te fa’ari’ira’a i te ‘aiū ‘āpī. Hō’ē ā ato’a nō te ta’ata i tā’atihia i te metua vahine o te ‘aiū nā roto i te fa’anahora’a PACS, ‘e ‘aore rā te ora ‘āmuira’a rāua. Rahi noa atu ā te fānau, e mara’a teie taime fa’afa’aeara’a i te 16 mahana ‘āufauhia.
‘Ia ravehia teie taime fa’afa’aeara’a i roto i te ārea e maha ‘āva’e mai te taime fānaura’a, ‘e’ita e fa’ari’ihia ‘ia fa’anu’u. ‘Ia fa’ataehia te anira’a i te ra’atira piha ‘ohipa, i te peretiteni o te pū ‘ohipa a te hau ‘e ‘aore rā i te fa’atere o te pū ‘ohipa, hō’ē ‘āva’e a’e hou te fa’afa’aeara’a. ‘Ia au i te tumu, e ravehia te tahi fa’anahora’a ta’a’ē, nō te rave ‘ohipa o te ‘ore i rave i tāua mau mahana fa’afa’aeara’a i roto i te pu’etau i fa’ata’ahia.
Nō te feiā tei ‘ore i fa’atumuhia i roto i te ti’ara’a rave ‘ohipa, tei ti’ahia ra e 6 a’e ‘āva’e ‘ohipara’a e tae atu i te fa’a’āpīra’a i tā rātou tau ‘ohipara’a, e fāna’o ato’a rātou i teie mau mahana fa’aeara’a nō ‘aiū fānau ‘āpī.
‘Ua hi’o-ato’a-hia te tahi mau fa’atanotanora’a i te mau arata’ira’a nō te parau fa’ati’a ta’a’ē nō te tahi mau ‘ohipa e tupu i roto i te ‘ōpū feti’i, mai te fa’aipoipora’a, te fānaura’a ‘e te ‘ati. Rāve’a teie nō te fa’a’aifāito ‘ia fāna’o te tā’ato’ara’a hō’ē ā arata’ira’a, mai te mau rave ‘ohipa tumu, rātou tei roto i te tau fa’aineinera’a ‘e ha’api’ipi’ira’a.