Piri ‘i te 220 mūto’i farāni ‘e mūto’i ‘a te hau tei tono hia ‘i ni’a i te purūmu no tahiti ‘e tō te mau motu, nō te pō matahiti ‘āpī.
‘I te pō tāpati ra, te 31 no Tītema 2023, 258 pere’o’o tei tāpe’a hia ‘e ‘o tei hi’opo’a hia ‘e te mau mūto’i, rotopū ia rātou, 20 feia fa’ahoro tei ‘ōfati te ture purūmu:
- ‘e 2 ‘e mea tere vitiviti;
- ‘e 3 ua hau te faito ‘ava ‘i roto ‘i te toto ‘e ‘e’ere ‘i te taime matamua ;
- ‘e 3 ua rave ‘i te rā’au ta’ero ;
- ‘e 2 ‘aita ‘e parau fa’ahoro ra’a pere’o’o ;
- ‘e 5 ‘aita ‘e parau ‘aore ia ‘e tāreta tō te pere’o’o ;
- ‘e 2 tei ‘ore ‘i huti te hatua ‘aore ra ‘aita ‘e taupoo pāruru ;
- ‘e 2 pere’o’o piti huira tei ‘ore ‘i fa’atura te parau hamani ra’a
- ‘Ei fa’aha’amana’o ra’a, 47% ‘o te mau ‘ati pohe ‘i ni’a ‘i tō tātou mau purūmu, no roto mai ‘i te tere vitiviti ‘o te mau faura’o.
‘I mua i te rahi ‘o te mau ‘ati purūmu ‘e tupu nei ia tae ‘i te mau ‘ōro’a hōpe’a matahiti, mai te inura’a ‘ava fa’ahoro atu ai te pere’o’o ‘aore ra, te tere vitiviti ‘i ni’a i te purūmu, ua ha’apa’ari hia te hi’opo’a ra’a ‘o te feia fa’ahoro. Te mau faura’o piti huira ihoa rā, ‘i te mea, 75% ‘o te mau ‘ati pohe ‘e tupu nei io tātou no roto mai ia teie mau faura’o. Mau rāve’a pāruru tei tu’uhia ‘i raro a’e i te ti’a’au ra’a ‘a te fa’atere rahi ‘o te mau mūto’i farāni, te tōmana Eric SPTIZ ‘e te ‘āua mūto’i ‘a te hau.
