Te ha’avāhia nei te taote Théron, te parihia nei ‘ona i te rave-‘ino-ra’a hō’ē uitiē, i te matahiti 2021, i tōna haerera’a atu ‘io na nō te hōro’a atu i tāna parau tītaura’a nō roto mai i te tōmite nui a te mau taote. 2 mahana i muri iho i te reira, e riro ra,’ua fa’a’ino ato’a taua taōte nei hō’ē mūto’i farāni nō taua tumu noa nei ā.
I teie nei mahana piti, piri i te ‘ahuru ta’ata tei tītauhia i te fare ha’avāra’a nō Pape’ete. Te ta’ata mātāmua i ti’a atu, ‘o Antony Géros. ‘Uiuihia te peretitni nō te fare ‘āpo’ora’a rahi nā ni’a i tōna ti’ara’a tāvana nō Pā’ea.
I tōna pae, ‘ua pari te taote Théron i te uitiē ei « ta’ata ho’o rā’au ta’ero ‘e te ha’avare ato’a ». Te nā’ō ato’a ra ‘ona « e mea pēpē noa te uitiē ‘iana iho ». I muri i teie mau fa’ahitira’a, ‘e’ita e ‘ore e horora’a ‘āpī te topa i ni’a ‘iana.
