E’ita e ‘ore ‘ua ite atu ‘outou tei tiki rahi tei pēnihia i ni’a i te patu timā o te fare tahua Maori ‘ia ha’apau mai ‘outou nā ni’a i te porōmu ‘aivi nō te tere atu i Pape’ete.
E ‘ōpuara’a teie nō roto mai i te rahu’a John pi’i-noa-hia HTJ. ‘Ua moemoea noa na ‘e ‘ua tupu roa. « Mai tō’u na’ina’ira’a tō’u hina’arora’a e pēni i teie patu tīmā ». ‘Ua manuia teie fa’anahora’a nā roto i te parau fa’ati’a a te mau fatu o te fare tahua ‘e te mau taiete ato’a tei pāturu ia HTJ.
‘Ua tu’i te ro’o o HTJ nā roto i te mau moiha’a e taraihia e ana ‘e ‘aore ra te mau tāo’a i pēnihia e ana. Te fā e tītauhia ra e ana, e pēni hō’ē a’e patu tīmā i te matahiti. « ‘E’ere roa atu hō’ēā ia pēni ‘oe hō’ē vāhi teitei ‘e te ‘ā’ano ato’a », i te mau ha’apāpūra’a a John.
Nō te pēnira’a ia Ahu Ra’i, ‘ua ‘āmui ato’a mai te rahu’a Tafetanui. Rāua to’opiti i te mā’itira’a mai i te mau tiare e tano ia pēnihia e tae noa atu te tā’ato’ara’a o te mau fa’a’una’una e ‘āua fa’a’ati nei i te tiki.