Tau matahiti i teie nei tō te tā’atira’a Te ū o te ora ha’ara’a i te fenua nei nō te ha’afaufa’a i te ū māmā, nā roto anei i te mau fa’anahora’a rau fa’atupuhia i te roara’a nō teie nei hepetoma, ‘e ‘aore ra, e fārerei tino i te mau metua vahine ‘aiū fanau ‘āpī i te fare ma’i.
« Pauroa tā’u tamari’i, ‘aita e ma’i mai te matahiapo tae atu i te hōpe’a. Mea au a’e nā’u e hōro’a i te tītī i te tītī punu. Mea maita’i ihoa pa’i te tītī māmā », i te reo ‘o hō’ē metua vahine nō fānau noa a’e nei te 8ra’a o tāna tamari’i.
« Te tītī māmā, e rāve’a tano teie nō pāruru i te mau tamari’i i te mau ma’i. E pāruru ato’a te reira i te metua vahine i te māriri ‘aitītī ‘i nia i te titi ‘e te vaira’a tamari’i. Iti ato’a te ma’i pōria ‘e mea mā te ū māmā, ‘aita e haerera’a e ho’o mai », i te mau ha’apāpūra’a a Cathy Mallo, tūati ma’i e te ha’apa’o faufa’a a te tā’atira’a Ū nō te ora.
I te fare ma’i, 85% o te mau vahine e hōro’a nei i tō rātou tītī ‘ia fānau. Teie rā, 15 mahana i muri iho, e fa’aea vetahi o rātou, toe noa mai ia 30%. Nō te rohirohi, nō te maui ato’a i ha’apae ai rātou i te fa’a’ote.
« I tō’u mana’o, tē hina’aro nei te mau māmā ‘ia turuhia rātou, ‘ia ‘āpe’ehia rātou e te mau tūati anei, e tō rātou iho ‘utuāfare e tae atu i tō rātou mau hoa », i te hi’ora’a a Maea Penilla Y Perella, tūati fa’afānau i te fare ma’i Ta’aone.
Nō te fa’afa’aitoitora’a i te mau metua vahine ‘aiū fanau ‘āpī ‘e nō te arata’i ato’a ia rātou, ‘ua mana’o te tā’atira’a e ha’amaita’i atu ā i tā na mau tauto’ora’a. Nō reira te fa’aotira’a e ha’amau hō’ē nūmera niuniu a piti matahiti i teie nei. I teie nei mahana, ‘ua manuia teie nei ‘ōpuara’a māoti te tauturu a te mau taiete mai ia Vodafone, Gaz de Tahiti ‘e Allianz Assurance.
‘Ua ha’amata teie nūmera i te fa’a’ohipahia mai te monirē 14 nō ‘ātopa. E pāhonohia mai ‘outou i te nūmera 89 600 800, 7 mahana i ni’a i te 7, mai te hora 8 i te po’ipo’i tae atu i te hora 8 i te pō. 29 rātou tūati o te fa’a’ohu nō te arata’i i te mau metua vahine ‘e nō te pāhonora’a i te mau uira’a. Nō teie tāpura ‘ohipa, e piti ‘aivāna’a nō te fenua Tanata ‘e te fenua Farāni tei haere mai e ha’api’i ia rātou.
‘E’ere teie nūmera i te mea tāmoni ‘ore. Teie rā, nō te mau ‘utuāfare e mea iti te faufa’a, e nehenehe teie mau tūati e tāniuniu atu ia rātou.
I te mahana mā’a 19 nō ‘ātopa, e tupu ato’a te mau fa’a’ana’anataera’a i te ‘āua nō Pā’ōfa’i.
