Ahu rima roa, piripou ‘āvae roa, ‘e’ere teie te faito ‘ahu mātauhia e André Vohi. Nō teie nei ‘ōro’a fa’afeti’ara’a, ‘ua ti’a mai ‘ona i te tomora’a o te ‘āua o te Fare James Norman Hall, ‘i Arue, nō te fāri’i tāta’itahi i tāna mau manihini. Nā te Tōmitera teitei, Eric Spitz i fa’afeti’a ‘iana. « Nō tātou teie nei feti’a. ‘Ua itehia tō tātou parau i rapae atu i tō tātou fenua ».
Te mau hoa, hoa ‘ohipa ‘e te mau feti’i tei ‘āmui nō teie mahana rahi. I rotopū ‘ia rātou, Thierry Peu, mātauhia i roto i te orara’a hoe va’a. « Tano maita’i ihoa teie feti’a e fa’a’utahia i ni’a iana ». ‘E te nā ‘o ato’a mai ‘e te ‘ata’ata « e ta’ata upo’o ‘ino ‘o André. Nō te mea hina’aro ana’e ‘ona fa’atāpae hō’ē ‘ohipa e tāpae ihoa ».
Fa’a’ite te huru orara’a o terā huira’atira e ‘aita e fa’ahitihia tōna parau
I te matahiti 2000 ‘o André Vohi i te tihepura’ahia mai i TNTV nei nō te rautī i te fa’anahora’a « A Tauturu ». I muri mai, ‘ua fa’anaho i te ve’a reo tahiti ‘e reo farāni.
I te matahiti 2004, ‘ua tonohia ‘ona i te fenua Tānāta i te ‘oire nō Québec, i te fare ha’api’ira’a tuatoru Laval, nō te ha’apa’āri i te pae nō te tōro’a pāpa’i ve’a. Te parau tū’ite i roto i te pūtē, i tōna hoi’ira’a mai ‘i Tahiti nei, ‘aita i fa’aea fa’ahou.
Tapati ‘aito, Va’a toa, Hawaiki Nui Va’a, Te Arata’i, Ta’ata Tumu, Pōrīnetia, terā te mau fa’anahora’a i ravehia mai e ana. Te vai ato’a ra te CPS Challenge TNTV, hō’ē ia fa’anahora’a nō te ‘aro i te ma’i pōria nā roto i te hoera’a i te va’a. ‘Ua turu ato’a te mau fa’anahora’a ‘e te mau taure’a nō Faa’a, Pira’e ‘e Arue mai te Tauati crossing.
‘Ua ati te mau motu nō Pōrinētia i te tāvirihia e ana. Te motu na’ina’i roa a’e nō Tuamotu, ‘ua tapae ‘ona e ‘ua ha’apūroro i te mau hōho’a nō te fa’a’ite i te tā’ato’ara’a te huru o te orara’a o terā huira’atira e ‘aita e fa’ahitihia na tōna parau.
I te matahiti 2015, ‘ua vaiho ‘o André Vohi ia TNTV ‘e ‘ua fa’atupu i tāna iho taiete tāvirira’a hōho’a.
![](https://www.tntv.pf/tntv/wp-content/uploads/2024/01/Famille-Vohi-1024x768.jpg)
« TEIE FETI’A NŌ INGRID ATO’A »
André Vohi i roto i tāna ‘ōrerora’a
I roto i te mau tāpura ‘ohipa ato’a tā André Vohi i rave mai, e nehenehe ‘ona e ti’aturi i tōna ‘utuāfare, i tōna ihoa ra hoa ha’aipoipo, Ingrid. I te 11 nō tītema 2023 te parau i te taera’a mai te ‘ohipa a te Tōmitera teitei, e fa’afeti’ahia tāna tāne. « Te’ote’o rahi tō’u ia André ‘e nō teie nei feti’a. ‘E’ere teie tōro’a i te mea ‘ōhie. ‘Aita e tai’ora’a i te hora ». Ua hau i te 20 matahiti, rāua noa ‘ia haere nā te mau motu. Te tumu ato’a ia ‘o André i parau i roto i tāna ‘ōrerora’a : « Teie nei feti’a, nō Ingrid ato’a ».
« I NI’A I TE OPE TŌNA HA’AMATARA’A MAI »
Urbain Vohi, te metua tāne ‘o André
E maha tamari’i tā André rāua ‘o Ingrid. Ia tere rāua nā te mau motu, i te pāpā rū’au mā ra te mau tamari’i e vai ai. E tāmuta te metua tāne ‘o André, teie nei feti’a hanahana « nō tōna ia itoito ». E te mata ‘ata’ata ‘o Urbain i te parau ato’a mai « i ni’a i te ope tōna ha’amatara’a mai… pauroa tā’u mau tamari’i, mai te matahiapo ‘e tae atu i te mau mo’otua. Ha’api’i pa’i, ‘ia ‘ite rātou, ‘e’ere i te mea ‘ōhie te orara’a ». Nō te metua vāhine ‘o André, Marita, « e ha’amāuruuru vau i te hau Farāni tei ‘ite i te ‘āravihi » ‘o tāna tamaiti« .
Hō’ē puta nō te fa’ati’a i te mau mea i orahia mai e ana
‘Ua riro teie fa’afeti’ara’a ‘ei rāve’a ato’a nō te tūra’i ‘ia André Vohi i te pāpa’i hope te puta tei ha’amatahia mai e ana a 5 matahiti i teie nei, toe noa atu i te tāhōho’ara’a iana.