Hō’ē ‘ahuru noa ‘āva’e, e ‘ūrī faito fa’ahiahia roa o Atlas. Tāna ‘ohipa, te a’ura’a e te taparahira’a i te ‘iore, ‘ānimara ‘e parare nei i pōrīnetia. A tau matahiti teie nei, e toru mau ‘ūrī mai iāna te huru, nō aotearoa mai te fa’ahaerera’a hia mai, e te ‘ohipa ato’a ra i rimatara e i ua huka. ‘E noa atu e ua ‘ite hia tō rātou faufa’a, tītau hia i te hō’ē pu’e tau maoro e ‘e moni ato’a nō te fa’aineine ia rātou, piti a’e mirioni e te ‘afa (2.5) te tapura faufa’a.
‘Aita teie ‘ūrī i ō i roto i teie fa’anahora’a hōpe’a, i te mea, ua fānau e ua ha’api’ipi’i hia ‘oia i pōrīnetia nei. ‘E i te reo ‘o tōna fatu, David PROIA, e mea ‘āpī a’e. « Fa’aineine ana’e hia iāna i te matahiti mātāmua, te toe ra ia e iva matahiti nōna nō te rave i te ‘ohipa. Ha’amana’o tātou, ‘ahuru noa matahiti te ‘uri nō te ravera’a i te ‘ohipa. ‘E toru matahiti tō te ‘uri ia fa’areva hia mai, mai te fenua aotearoa. Mea rahi roa piti matahiti, nō te ‘uri ihoa ra…’Aita te ‘ohipa i oti atu ra, e ‘ōpuara’a teie i ha’amau hia nō te pāhono i te anira’a a te nūna’a. Ha’amāuruuru nei au ia Marcel suhas i te fa’aineine noa ra’a ia Atlas, nō te mea, ‘e’ere i te mea ‘ōhie nō te fa’arata te ‘ūrī ».
E parau tū’ite nō te ha’api’ipi’i te ‘ūrī, e ti’a ai, ‘aita ra tā rātou parau tū’ite e ha’afaufa’a hia ra i pōrīnetia nei nō te ha’apāpū tō rātou ‘aravehi ia fa’aineine i te hō’ē nō te a’u e nō te taparahi te ‘iore. Nō teie fa’a’ite’itera’a, ua mara’a ‘i teie ‘ūrī i te rave te ‘ohipa i roto e i rapae i te hō’ē piha, te mea i fa’ahiahia maita’i hia e Marcel suhas, te ta’ata fa’aineine ‘o Atlas. « ‘I roto i teie mau tauiha’a, ua rau te huru ‘o te hau’a, e ua māta’ita’i hia i tōna itoito e tāna ‘ohipa i rave, te mā’imira’a tae noa atu i te taime ‘a ‘ite hia ai. ‘Oa’oa rahi tō’u i tā’u ‘ūrī i fa’aineine nō teie taime. Nō te taime mātāmua roa i tahiti nei, e te reira te mea e hina’aro hia rā. Ia nehenehe ‘e ‘ite hia e te vai ra, te feiā fa’aineine te ‘ūrī i pōrīnetia nei ».
‘E i rotopū i te mau manihini i tītau ato’a hia nō teie fa’aiteite ra’a, te tāvana tuha’a nō teavaro, Ronald teariki, tei fa’ahiahia i teie fa’anahora’a, ‘ei mana’o pārurura’a ihoa i te ‘uputa tomora’a nō mo’ore’a, te uahu nō vai’are « nō te huira’atira nō mo’ore’a, e ‘ohipa fa’ahiahia roa, e ‘ite ato’a hia rā teie mahana, ‘a tahi roa fa’anahora’a ‘a rave hia ai ‘e mai teie te huru ‘e nā tō tātou iho mau ti’a nō pōrīnetia nei e ha’api’i i tā tātou mau ‘ūrī nō te ravera’a i teie mau fa’anahora’a… »
‘E hope te fa’aineine ra’a a Atlas i roto ‘ina ‘āva’e e piti i muri nei, taime roa nō te fa’aterera’a nō te fa’anaho ‘e ha’apāpū ‘ihea ‘oia ‘e ‘ohipa atu ai.
