I te ha’amatara’a, e tere ‘o Claude Ah Min nā te nohora’a o te ta’ata nō te tātā’i i te mau mātini ‘ino. I teie mahana, ‘ua roa’a ‘i te hō’ē vāhi ‘ohipara’a, rau huru mātini tāna ‘e tātā’i nei, tō te pere’o’o anei, te faura’o piti huira, te mātini tāpū ‘aihere ‘e te vai atu a.
Ia oti tāna ‘ohipa i te hora maha i te tapera’a mahana, e haere ‘o Claude e tautai nā raro i te moana ‘e piti a’e hora. Pinepine ‘ona i te ‘itehia i te ava nō Ta’apuna ‘aore ra ‘i Fa’aa. ‘Ua riro teie ‘ohipa nōna ‘ei rāve’a nō te tāmarū i te tino ‘e nō te tauturu i te ‘utuāfare.
Te ‘ohipa tautai nā raro i te moana, nā tōna pāpā rū’au i ha’api’i iana i te tau ‘a ora ai rātou i te mau pae Tuamotu mā. ‘Ua fa’aru’e mai te rū’au ‘āre’a ra te ha’api’ira’a i hōro’ahia ‘a ‘āhuru mā piti (12) matahiti teie nei, te vaivai noa ra ā ia. « ‘Ua fa’ahiahia roa vau i te ‘itera’a tō’u pāpā rū’au i te hopura’a nā raro i te moana ‘e te mau ma’o, i reira tō’u hina’arora’a e tautai ato’a ‘e tae roa mai i teie mahana » i te reo ‘o Claude Ah Min.
Nā roto i tōna ‘aravihi i te tautai nā raro i te moana, ‘ua ha’api’i ato’a ‘o Claude ‘i te ravera’a o terā ‘e terā i’a. ‘Aita ‘oia e tū’ati nei i te mana’o ‘o vetahi te na’o nei e, ‘aita e i’a fa’ahou « ‘ua rau te mau i’a, mai te ume, te mū, te ‘o’eo, te pā’aihere ‘e te vai atu ra….’e tera i’a tāna ravera’a, tei te huru noa o tā ‘oe fa’a’amu’amura’a i’a, tītauhia te ‘aravihi ».
Ta’a’ē atu i te parau ‘o te tāmarūra’a i te tino ‘aore ra ‘ei fa’a’ana’anataera’a, ‘ua riro ato’a teie ‘ohipa tautai nā raro i te moana ‘ei ‘imira’a faufa’a fa’ahiahia nō te ‘utuāfare
« ‘E rāve’a teie nō te tauturu ‘i te ‘utuāfare ‘i te hope’a ‘āva’e, te tahi moni hōro’a ato’a nā te mau tamari’i. ‘Aita, mea ho’ona roa… »
Mai tā tōna iho pāpā rū’au ‘i ha’api’i iana, ‘ua ‘ōpere ‘o Claude i teie ‘ite ‘o te tautai nā raro i te moana i tāna tamāroa, nō te tauturu i tōna iho orara’a nō ‘ananahi.