E maha o rātou e fānao nei hō’ē fa’aaura’a ‘ohipa tau poto : hō’ē pāpa’i parau ‘e toru ta’ata nō te tātā’i i te mau moiha’a tei ‘ino ‘e ‘aore ra ‘aita e hina’aro-fa’ahou-hia e te ta’ata. Nō reira, e hopoihia mai rātou i tāua pū ra e te feiā ‘ohi pehu a te ‘oire nō Mahina.
Nō teie hepetoma, te tāmuta tauiha’a rā’au ia. Te hāmani nei ‘o Vatea hō’ē pa’epa’e tanura’a mā’a. E tunu mā’a te ‘ohipa a teie taure’a i muta’a ra e te tītau nei hō’ē tōro’a ‘āpī. « Mea maita’i e roa’a mai te tahi ‘ohipa pāpū. ‘Ohipa ‘āpī teie nō’u ‘e mea au nā’u. Mea marū te ravera’a », i te reo o Vatea Taerea, hō’ē o te mau taure’a e ha’a ra i tāua pū ra.
Mai te ‘āva’e tiunu e tae mai i teie nei mahana, te mātini pu’a ‘ahu, te ‘āfata teata, te ‘auri ‘ahu ‘e te mātini tunu ‘e tāmahanahana mā’a tā teie pū i tātā’i. « Te mau moiha’a terā i fa’aru’ehia i te pae porōmu o tā te ‘oire e ‘ohi nei i te mau ‘āva’e ato’a i roto i te mau aroa nō Mahina. I’ō nei e horo’a mātou hō’ē orara’a ‘āpī nō teie mau moiha’a », te mau ha’apāpūra’a a Roger Opeta, te pāpa’i parau o te pū tātā’ira’a.
I te fare ha’api’ira’a Amatahiapo i Mahina teie pū e vai ai. Fa’ari’ihia mai tā ‘outou mau tauiha’a hōro’a mai te monirē tae atu ‘e te mahana toru.
