Tau ‘āva’e i teie nei te ‘itera’ahia te huru o te mau tupa i te marae. Te tumu ia nā tā’atira’a e piti Pu’utarape ‘e te Papa hīro’a ‘e faufa’a tumu i mana’o ai e tāhō’ē, ‘ia ‘ore e rahi roa atu te mau rave-‘ino-ra’a a te mau tupa. ‘Aita atu e rāve’a e rama.
‘Ua pō, tē fa’aineine nei te mau mero nō te tā’atira’a Pu’utarape i te haere i ni’a marae Taputapuātea e popo’i i te mau tupa, ‘ua pu’e noa. Nō vetahi, ‘ua ‘o’omo mai i te mau rimarima.
« E ‘imi ato’a te tupa i te pāruru iāna. ‘Eiaha e hape, e hōhoni« , i te reo ‘o Olivier.
Tau minuti noa, ‘ua ‘ī te pātete mātāmua. I ni’a i te māhora, i te pae tahatai, i roto i te mau a’a tumu rā’au ‘e nā te hiti o te mau tahua, ‘e’ita e pau i te tāi’o, ‘ua ‘ōta’a noa te tupa.
« E heru rātou i te ‘āpo’o nā te mau vāhi ‘ōfa’i, e nehenehe rātou e topa, nō reira mātou e haere mai ai e haru i terā mau tupa« , i te reo ‘o Vetea Maltby, peretiteni nō te tā’atira’a Pu’utarape.
‘Aita i ātea roa atu, i te pae matie, ‘aita ta te tupa e mā’itira’a. Te tumu ha’ari, te ‘autī, te mau rā’au tanu, mea tā’iri ihoa. Nō vetahi, ‘aita e ‘ōmo’o fa’ahou.
« Mea au nā te tupa i te ‘amu i te tiare », a ‘ohi noa ai ‘o Vetea Maltby i teie mau ‘animara tei tāpae roa i ni’a i te mau ‘āma’a. « ‘Aita ato’a mātou i hina’aro e tu’u i te rā’au nō te ha’apohe i te tupa. Nō reira mātou e haere mai ai e rama ».
‘Ua pāturu ‘o Papa hīro’a ‘e faufa’a tupu i teie tāpura ‘ohipa, ‘ia pe’ehia ra te mau arata’ira’a.
« Nā mua roa, ‘eiaha mātou ia rahi, ‘eiaha ato’a e haere i ni’a i te marae », i te mau ha’apāpura’a a peretiteni nō te tā’atira’a Pu’utarape.
Hau i te 60 kiro tupa i roa’a i tāua pō ra, mea iti ‘ia fa’aauhia i te ramara’a mātāmua. E tamau ā te tā’atira’a i teie fa’anahora’a ‘ia tae i te tau ueuera’a huero.
