‘Oi’oi roa teie parau i te pararera’a i Huahine, e ha’amata ‘o Air Moana i tāna mau rerera’a i tāua motu ra i te ‘āva’e tiurai. E hitu tere tei tārenahia i te hepetoma hō’ē. Parau ‘āpī fa’ari’i-maita’i-hia e te huira’atira.
Tē parau mai ra hō’ē vahine, « e mea maita’i roa nō mātou i Huahine nei ». Te tahi pāpā « ia mana’o vau e ‘ohipa maita’i nō te mau rātere. E nehenehe pa’i rātou e tāpe’a mai i Huahine ‘e māta’ita’i te ruperupe ‘o Huahine ». « A piti ‘aore rā toru matahiti teie ‘ōpuara’a, te fa’aarahia mai ra, e tapae mai ihoa ‘o Air Moana i te ‘āva’e tiurai », i te reo ‘o Lydie Fa’ahu, ti’a’au i te fare tāmā’ara’a i te tahua taura’a manureva.
Nā roto i teie fa’aotiraa e māmā mai ia te mau tārifa titeti, rahi ato’a mai ia te mau terera’a manureva i Mata’irea. E fa’atupu teie ‘ōpuara’a i te ‘ohipa, ‘inaha tē tihepu nei te taiete i te mau rave ‘ohipa nō te ti’a’au i te mau horopātete. Nō te mau fatu taiete, e faufa’ahia te imira’a.
« Mea au nō te tā’ato’ara’a, matara te ‘uputa i nā taiete e piti, Air Tahiti ‘e Air Moana« , i te reo ‘o Lydie Fa’ahu.
I te taura’a manureva tītauhia e fa’aineine i te vāhi ‘ohipara’a nō te mau rave ‘ohipa a te taiete e o ‘āpī mai. Nō te peretiteni Moetai Brotherson, ‘ua ferurihia te reira tuha’a.
« ‘Ua tuatāpapahia teie parau e te piha e ti’a’au ra i te mau tahua taura’a manureva. ‘Ua ‘itehia te tahi tātuha’ara’a, 2 nā Air Tahiti, 2 nā Air Moana nō te fa’ari’ira’a i te mau horopātete. ‘Aita ia e taupupūra’a ».
Nā roto i teie fa’aotira’a e o ato’a ‘o Air Moana i ni’a i te mātete tei mauhia e Air Tahiti hau i te 60 matahiti i teie nei.