Te ‘ū’ana noa atu ra te tapiho’ora’a o te rā’au ta’ero Ice i Pōrīnetia Farāni nei, i te mau motu ihoa ra haere-rahi-hia e te mau rātere, mai ia Bora Bora ra te huru. Noa atu te utu’a e topa mai, ‘aita te ta’ata e taia i te reva i te fenua Marite nō te fa’aho’i mai i tāua rā’au ta’ero ra.
‘Ua uiuihia ‘o Gaston Tong Sang, tāvana nō Bora Bora i ni’a i te mau rāve’a e fa’a’ohipa e te ‘oire nō te arai i te Ice. Teie tāna pāhonora’a : « ‘Ua ‘ite mātou e teie fenua, rahi ana’e te ‘ohipa, rahi te moni. E riro te reira, ‘ei tāpapara’a nō te feiā ‘e ho’o te mau rā’au ta’ero. ‘Ua ‘ite maita’i mātou te reira ‘ohipa, nō reira, te hina’aro nei mātou ‘e ha’amau hō’ē pū ta’a’ē, teie ihoā ra mau ‘ūrī. E ‘ite ‘oi’oi-noa-hia e rātou i teie mau ta’ata e ‘āfa’i mai ra i teie mau rā’au. Te reira tā mātou e hina’aro. Te hina’aro ra mātou e fa’a’ite i teie mau ta’ata ‘e ho’o ra teie mau rā’au, ‘a ara maita’i i teie fenua nō Bora Bora, ‘e’ita ‘outou e haere noa mai terā, e roa’ahia ‘outou māoti teie mau ‘ūrī tā mātou e fa’aineine ra i te fa’ahaere mai. Mau ‘ūrī ‘aravihi teie nō te pāherura’a i te mau rā’au ta’ero. Nō te pāruru ihoa ra i tā mātou mau tamari’i. ‘Aita tā mātou mau tamari’i e hina’aro e topa i roto i terā ‘ati, nō teie feiā e ho’o ra i te pohe. Te reira tā mātou ‘arora’a. ‘Ua hina’aro vau, i te tahi taime, ‘āmui mātou pā’āto’a, te mau ‘ētārētia ato’a te mau tā’atira’a ato’a, mai tā mātou e ti’a nei i ni’a i teie tahua. Hō’ē ana’e mātou ‘i mua i teie parau, ti’aturi vau e, e mau teie fifi…Te tīa’i ato’a ra vau hō’ē ha’amanara’a, tu’urimara’a mātou ‘e te ‘āua mūto’i farāni ‘e te tōmitēra teitei nō te rave ‘āmui i teie ‘ohipa, te pāruru a’a ihoa ‘i tō tātou feiā ‘āpī. »
