Nā roto i te fa’a’ohipara’a i teie mau rāve’a, 20 tae atu 25 tētoni tītauhia nō te hi’opo’a i te horopātete tāta’i tahi. ‘Ōhie nō te haerera’a o te mau horopātete nā reira ato’a i te ‘ohipa a te mau mūto’i ‘ōti’a.
I te hi’ora’a a François Pinote, te ra’atira o te taiete ADT, ‘o Faa’a « te tahua taura’a manureva nō te aramoana i fāna’o mātamua i teie mau huru mātini. Nā roto i te fa’a’ohipara’a i teie mau rāve’a ‘āpī, te fa’a’ite ra ‘o Pōrīnetia te fā e tītauhia ra e ana. Ia tomo mai te ta’ata, e tu’u ‘ona i tāna puta rātere i ni’a i te paruai roro uira. E hi’o te mātini e tūea anei te mau parau e te mau ‘ohipa i fa’aharuharuhia i ‘Europa i ni’a i tāua ta’ata nei. E pata ato’a te mātini i te hōho’a o te ta’ata, hou a hōro’a mai ai te parau fa’ati’a ‘e ‘aore ra e’ita ».
I te vāhi revara’a nā te ara teie mau pou i te tu’ura’ahia, 100 mirioni te tāpura faufa’a nō teie mau rāve’a. E ha’amata te fa’a’ohipara’a i teie mau mahana i muri nei.
I te pae o te mau rerera’a nā te mau motu, e fa’a’āpīhia te vāhi tīa’ira’a ‘e patuhia hō’ē ‘ūputa hau atu faufa’a nō te mau taime fa’arevara’a. Tārenahia teie mau patura’a nō te matahiti 2026. I te matahiti 2023, 643 157 ta’ata tei reva i te mau motu.
I ni’a i te tahua taura’a manureva, ‘ua mana’ohia e patu 4 tāpe’ara’a manureva ‘āpī, ia nahonaho nō te fāri’i i te tā’ato’ara’a o te mau taiete, Air Tahiti, Air Moana ‘e Motu Link.
« I tō mātou pae, te nu’u ra te ‘ohipa nō te pāhono i te mau hia’ai a te hau fenua, a te mau hoani ‘e a te mau taiete. Terā tā mātou fā ‘e te mau tāpura ‘ohipa i fa’anahohia nō nā matahiti e piti e orahia atu. Te ‘ite ato’a mai ra ‘outou e te rahi noa atu ra te rahira’a rātere », i te reo ‘o Gwenvael Rosin-Hardy, ra’atira o te taiete Aéroport de Tahiti.
‘Ia nūmerahia, nō te matahiti 2024-2025, 5.7 miriā te tāpura faufa’a i fa’ata’ahia nō te mau patura’a ‘āpī. I roto i teie nei tino moni, 1.3 miriā tei fa’ata’ahia nō te mau tahua taura’a manureva nō Ra’iātea, Bora Bora ‘e Ra’iroa.
