Mahana piti, ‘aita te mau tamari’i i tāmā’a. Te tumu, nō te mau manumanu i ‘itehia i roto i te mā’a, terā mau huru manumanu e ‘ite-ato’a-hia ra i roto i te mau pū’ohu raiti anei. Nā te mau tamari’i iho i fa’ati’a i tō rātou metua. Teie ia tā Bruce, metua tamari’i, e maere nei, inaha ‘aita rātou i fa’aarahia e te fa’aterera’a nō te ha’api’ira’a. « I te pō, i tō’u ho’ira’a atu nā te ‘ohipa, mea rahi te metua tei fa’atae mai ia’u i te poro’i nō terā fifi. Ani atu ra vau i te metua vahine o tā māua tamahine, te pāhono mai nei terā, e parau mau ihoa. » Teie ato’a ia e ririhia nei e Bruce : « Aita ato’a fa’aterera’a ha’api’ira’a i fa’aara noa a’e mai. Mai te hora 7:15 ‘e tae atu i te hora 3:30 i te tahara’a mahana, tei raro a’e te mau tamari’i i tāna ti’ā’aura’a. »
Te fa’a’ite ra ‘o Raimere, e ‘ua huru ‘ē roa tana tamari’i, e 7 matahiti, i te ‘itera’a i te manumanu i roto i tāna merēti. « I te po’ipo’i a’e noa tō mātou fa’aarara’ahia i tāua fifi ra. Te ti’aturi nei au ‘e’ita e tāpiti fa’ahou. »
Nō reira, ‘ua fa’atae te tā’atira’a metua tamari’i hō’ē rata i te fa’aterera’a o te ha’api’ira’a ‘e i te tāvana Teura Iriti :
I tōna a’e pae, ‘ua fa’atae ato’a mai te taiete tunu mā’a hō’ē rata tātarahapa i te mau metua tamari’i. « ‘Ua vauvauhia mai mea nāfea rātou ‘ia rave i te mā’a… ‘aita ra vau e ti’aturi roa ra. »
I roto i tāna rata, te fa’a’ite ra te taiete Newrest e « ‘ua ‘iriti-‘oi’oi-hia te mā’a ‘e ‘ua ‘imi mātou nō hea mai te fifi. E riro rā hō’ē ‘aore ra ‘e 2 pū’ohu tei ‘ōfa’ahia e te manumanu, nō te mea nō roto mai te mau manumanu e 2 fa’ari’i mā’a, ‘ia fa’aauhia i ni’a i te tā’ato’ara’a o te mau punu mā’a i ‘operehia nā roto i te mau fare ha’api’ira’a. »
I teie nei po’ipo’i mahana maha, ‘ua tupu hō’ē fārereira’a i te fare ha’api’ira’a Tamahana i rotopū i te mau metua tamari’i, te fa’aterera’a ha’api’ira’a, te fa’aterera’a nō Newrest ‘e te tāvana nō Arue, Teura Iriti.
« I teie mahana, e parauparau, ‘eiaha ra teie ‘ohipa ‘ia tupu fa’ahou. Teie taiete, ‘ua tātarahapa ‘ona i mua i te ‘ohipa i tupu. Terā ato’a tōna reo, e imi ā rātou te rāve’a ‘ia mata ara hau atu ā rātou i ni’a i te mā’a tā rātou e tunu ra », i te reo ‘o Teura Iriti.
I tō rāua a’e pae, ‘aita te taiete Newrest ‘e te fa’aterera’a ha’api’ira’a i fa’ari’i i te pāhono i te mau uira’a a TNTV.
