Tau tetoni noa te matarara’a te mau ‘uputa, ua pu’e noa te ta’ata i mua i te piha fa’a’ipo’iporaa nō te ‘oire nō Puna’auia. Te fā, fārerei ‘e ‘aitaui ato’a e te mau fatu ‘ohipa. Tamuta uira, tuati i roto i te mau hotēra ‘e te mau fare tāmā’ara’a, te feiā tamā fare, te feiā tāmā ‘āua… mau ti’araa e tītauhia ra e te feiā ‘imi ‘ohipa. « Aita vau e mā’iti i te ‘ohipa, te ‘ohipa nā mua mai », i te reo ‘o hō’ē o rātou. « Haere tāpū ‘aihere, haere vāere, te ‘imi ra rātou i te ta’ata », ‘ia fa’aro’ohia atu te tahi.
‘Aita te taime paraparaura’a i tā’ōti’a. ‘Ua ‘ite te fatu taiete e aha te faito ta’ata tāna e ‘imi ra. « Mea rau te mau ‘ohipa i roto i tā mātou tuha’a. Te tunura’a mā’a, tuati vāhi inura’a, o te mau ti’ara’a ia e tītauhia ra », i te reo ‘o Sahanézia Mahuta, ti’a nō hō’ē hotēra. « ‘Ia ‘āmuihia, tē ‘imi nei mātou i te feiā tunu mā’a, te mau tauturu ‘e te ta’ata ha’apa’o faufa’a », te mana’o ‘o Christophe Liao.
I te tahua mātāmua, ‘ua ‘āpapa noa te feiā ‘āpī i mua i te mau fa’ehau. Hau i te 20 000 fa’ehau e tihepuhia nei i te matahiti ‘ati a’e i te mau fenua nō te aramoana.
Nō te tāvana e fa’atupu nei i teie huru fārereira’a nō te taime mātāmua roa i Puna’auia, e hutira’a aho teie. Te ti’a mana mātāmua o tā te huira’atira e tāpapa nō te ani i te ‘ohipa. I teie nei mahana, 50 ‘ohipa e fāna’ohia e tōna mau ta’ata. « Mana’ona’ora’a rahi te reira nā te mau tāvana, o tā te huira’atira e haere mai e pātōtō. Te mea e ti’a e ravehia e te mau tāvana ‘e te mau ‘oire, te fa’a’ōhiera’a nō te tauturura’a i teie mau taure’are’a », i te reo ‘o Simplicio Lissant.
‘Ua ‘āmui ato’a mai te mau pū ha’api’ira’a tōro’a. ‘Ua tae ato’a mai te fa’aterehau nō te ‘ohipa nō te ha’apāpū e te vai ra te ‘ohipa i te pū SEFI. E riro rā 7000 rahira’a nō roto mai i te mau taiete, teie rā nō te feiā ‘ua ha’apa’arihia i ni’a i te tōro’a. « E anira’a terā nā te mau taiete, teie rā ‘aita e tū’ati roa ra i te mau parau tū’ite anei ‘e ‘aore ra te ‘aravihi o tō tātou nei ta’ata e ‘imi ra i te ‘ohipa », i te mau ha’apāpūra’a a Vannina Crolas, fa’aterehau nō te ‘ohipa.
Te ‘ōpua atoa ra te tahi atu mau ‘oire mai ia Pā’ea ‘aore ra Mo’orea e fa’atupu i teie huru farereira’a. Mea faufa’a i te mea 55 000 ta’ata e ‘ere ra i te ‘ohipa i Pōrīnetia nei.
