I te mahana pae i ma’iri a’e nei tō te ‘aupupu CSIP fa’aotira’a e tu’u hō’ē ‘ōpuara’a fa’aeara’a ‘ohipa i te taiete Gaz de Tahiti. I reira, 55% o te mau rave ‘ohipa tei natihia i tāua aupupu ra. ‘Ia ‘āmuihia, 12 anira’a tei tu’uhia i mua i te aro o te mau fa’atere nō te taiete e te mau rave ‘ohipa e ha’a ra i roto i te tuha’a ha’aputura’a māhu e nō te ‘ōperera’a. I rotopū i te mau anira’a, ‘ia ha’amara’ahia te moni ‘āva’e ‘e ‘ia hi’ohia te mau moni tāhinu.
I teie nei mahana toru te mau tau’ara’a parau i rotopū i te aupupu e te fa’aterera’a taiete i te ha’amatara’a.
« ‘Ua hiti mahuta mātou i te topara’a mai teie nei ‘ōpuara’a fa’aeara’a ‘ohipa i te mahana pae ra, i te reo ‘o Laura Seguin-Siu, ti’a nō te fa’aterera’a Gaz de Tahiti. I te roara’a o te matahiti 2023, ‘ua tupu tāmau te mau rurura’a ‘e te mau rave ‘ohipa,’aita e tāpa’o e fa’a’ite ra e te vai ra te fifi. Nō reira mai te maere. ‘Ua tau’aparau mātou e 4 hora i teie nei mahana, ‘ua tupu maita’i. »
‘Ua tārenahia hō’ē fārereira’a ‘ananahi mahana maha mai te hora 10:30.
