50 matahiti tō te ‘ātimarara Guillaume Pinget, ‘ua haere a’e na mai ‘ona i te fenua nei. « I te hopera’a o tā’u ha’api’ira’a ‘ōfitiē nō te nu’u moana, ‘ua fano mai au i Pōrinētia. I tāua tau ra, ‘i Noumea te tā’amura’a pū o tō’u manuā. I roto nā matahiti e 2, ‘ua tonohia mai au e 6 ‘āva’e i’o nei », i te reo o te ‘ātimarara.
« I teie nei mahana, tē ‘oa’oa nei au i te ho’ira’a mai nā ni’a i te ti’ara’a tōmana o te mau nu’u ‘i Pōrinētia nei« , ti’ara’a mana’o-‘ore-hia e ana i tōna ‘āpīra’a.
Hou a riro mai ai ‘ei ‘ātimarara, ‘ua tōmānā mai na ‘ona e 3 manuā tama’i a te nu’u mai te mānua taura’a manureva Charles de Gaulle.
I rotopū i te mau rāve’a a te nu’u moana, te vai ra te manuā mata ara Teriieroo a Teriierooiterai tei tapae mai i te fenua tau ‘āva’e i teie nei.
« E tae ato’a mai te mau manureva ‘āpī nō te hi’opo’ara’a i tō tātou mau ‘ōti’a moana (…) Tē ha’apāututuhia nei te mau rāve’a pārurura’a ia Pōrinētia. Terā tā mātou tauto’ora’a ‘i’o nei » mai tei ha’apāpūhia mai e te ‘ātimarara Guillaume Pinget. I roto i tāna ‘ōrerora’a, ‘ua ha’amāuruuru ato’a ‘ona ia Geoffroy d’Andigné, te ‘ātimarara i monohia e ana, nō te mau ‘ohipa ato’a tāna i rave mai.
