E haru ihoa te mata i ni’a i tāua hōtēra ra ia tere ana’e nā te aroa Pōmare e tīpu’u atu ai i ni’a i te aroa Prince Hinoi. Fatuhia o Maita’i Express e te taiete HMS ‘e Pacific Beachcomber.
Nā te mau metua ‘o Cléo Mourareau, peretiteni o te fatu taiete, i patu mātāmua i teie fare tahua i te tau o te hōtēra Ibis ‘e te perēra’a moni. ‘Ua tātā’ihia e ‘ua monohia. ‘Ua ti’a mai 62 piha tā’otora’a tei fa’anehenehehia e te mau moiha’a rima’ī nō te fenua nei. « ‘Aita mātou i hina’aro ‘ia fa’ahōho’ahia mai te mau piha fare ma’i ra te huru, hō’ē ā mōrī, hō’ē ā parahira’a. ‘Ua rohi ‘āmui mātou e te feiā rima’i ‘aravihi nō te fa’aohipa i te pareo, te raufara anei… ».
« ‘Ua tīa’i noa te ta’ata te ‘ohipa e ravehia i’o nei mai te ha’amatara’a te mau tātā’ira’a », i te reo o te ra’atira hōtēra, Teipo Faaeva.
‘Ia hi’ohia teie fare tahua, mea roa noa tōna fāito, mai te pahī ra te huru. Te fā e tītauhia ra, fāri’i i te mau ta’ata ‘ato’a, nō te mau motu ‘e nō te ara. « Te vai ra tō te mau motu, te mau horopatete ato’a nō te mau pahī. Tei roto mātou i te ‘oire pū, ‘e’ere te mātete i te mea ātea, ‘ōhie ato’a nō te mau manihini nō te haere e māta’ita’i, ‘aita e faufa’a e pere’o’o. Te mau mea ato’a tei pīha’i iho noa i te hōtēra », i te reo ‘o Christophe Gomet, ra’atira o te mau pupu hōtēra Maita’i.
‘Ua ha’amata te Maita’i Express i te fāri’i i te mau manihini mātāmua.