Nō te hunara’a ma’i, ‘ua fa’ata’a te ‘oire nō Taputapuatea ‘e 2 tā fenua ‘i te tuha’a nō Fa’aroa. Mea tāmoni ‘ore ‘e nā te ‘oire ‘e tāmā ‘i tāua vāhi ra. ‘Iritihia ‘i te matahiti 2014 ra, 18 ana’e menema ‘e vai ra ‘i reira.
« ‘E fa’ahepora’a teie», ‘i te reo ‘o Thomas Moutame, « tera rā, mea huru fifi ato’a ‘ia fa’aru’e mai hō’ē mero ‘i roto ‘i te ‘ōpū feti’i ‘e haere atu ‘e parau ‘ia rātou ‘e te vai ra tā tātou menema ‘i Fa’aroa nei… Terā ihoa ia te parau, ‘e Tāvana mea aroha roa pa’i ‘aiū mā, hina’aro ihoa pa’i mātou ‘e huna ‘i te fare nei, fa’ari’i ihoa ia te Tāvana ».
Te fa’aru’era’a mai hō’ē mero nō te ‘utuāfare, ‘e ‘ere ‘i te mea ‘ōhie. Nō reira te rahira’a ‘o te mau ‘utuāfare feti’i ‘e huna ai te ma’i io rātou iho, ‘aita rātou ‘e ‘ite ra te fifi.
« ‘Aita te hunara’a ‘a te ‘oire ‘i kirometera io’u, terā ra mea au a’e nā’u ‘e tāpe’a mai tō’u mau feti’i ‘i pīha’i iho ia’u, ‘e roa’a ‘ia ‘i te tāmāhia. ‘Āfa’i ‘i’o, ‘e vai ‘ia ‘i roto ‘i te ‘aihere », te mau ha’apāpūra’a ‘a hō’ē ta’ata nō Taputapuatea.
‘E mai te mea te fāri’i ra te mau mero mā’iti ‘i teie huru fa’anahora’a tae mai ‘i teie nei mahana, te ture ra, ‘aita roa atu ia mai te taime ‘a fa’ata’a ai te ‘oire hō’ē māhora.
« Teie noa matahiti ‘i mua te matahiti hōpe’a, ‘e ‘i muri mai ‘e’ita tātou ‘e nehenehe fa’ahou ‘e huna ‘i roto ‘i tō tātou mau ‘āua ‘utuāfare, ‘e au ‘ia tātou ‘e fa’aineine ‘i teie taime », ‘i te reo ‘o te tāvana Moutame.
‘E nehenehe te mau parau fa’ati’a ‘i te hōro’ahia ‘i te mau ‘utuāfare ‘o te ani atu ‘i muri a’e, teie ra, ‘e tītauhia te mau tītorotorora’a ‘o te hōho’a fenua. ‘Aita atu ia ‘i tō Taputapuatea ‘i te pe’era’a ‘i te mau fa’aturera’a mai tera ‘i ravehia mai ‘e tō ‘Uturoa.