E mata ‘oa’oa tō te tā’atira’a Te Ora Hau ‘i te po’ipo’i mahana mā’a nei ‘i muri hō’ē hora mātutura’a ‘e te Peretiteni Moetai BROTHERSON ‘e te mono peretiteni Eliane TEVAHITUA, te fa’aterehau e tī’a’au ato’a ra ‘i te arutaimareva ia au ‘i tāna ‘arora’a tu’utu’u ‘ore ‘i ni’a ‘i te mau huru māniania. ‘I te reo ‘o peretiteni ‘o te tā’atira’a Maea TEMATUA, 57 ‘i ni’a ‘i te hānere ‘o te mau horora’a ‘i tu’uhia ‘e te ta’ata, te tumu ‘o te māniania ‘ia fa’atupuhia ‘e te mau pereo’o « Boum Boum ».
« Ua ‘apo mai raua tā mātou mau parau, tā matou ia ‘e māuruuru maita’i nei. Nō te mea, ‘ua fa’ari’i rāua ‘i te fa’aro’o ‘ia matou : ‘e aha tō mātou mana’o, ‘e aha te mau ‘ohipa tā mātou ‘e fa’aineine rā ‘ō tei rave-a’e-na-hia ‘e ‘ō tā mātou ‘e fa’aineine fa’ahou nō te tāu’aparaura’a ‘i tō tāua nei nuna’a nā roto ‘i te mau mero ma’itihia ‘e te nuna’a…..Mana’o maita’i roa tā rāua ‘i tu’u mai, nō te mea ‘ua ‘iriti rāua te ‘uputa nō te fārerei ‘i te mau mero ‘i roto ‘i te ‘āpo’ora’a rahi. Te vai ra hō’ē tōmite tī’ā’auhia ‘e te tahi tuahine (…) ‘Ia ‘ore ana’e te ta’ata ‘e fa’atura ‘i tōna tāea’e, ‘i reira te mau fifi ‘e tae mai ai. ‘Aita mātou ‘e pāto’i ra ‘i te mau hīmene, ‘aita… ‘Ia ‘u’ana ana’e rā, ‘e nā roto ‘i te ha’apa’ora’a ‘ore, ‘i reira mātou ‘e parau e, ‘e mea mā, ‘a fa’atura ato’a mai, fa’aiti mai tā ‘outou ‘upa’upa, fa’atano noa nā ‘outou. Te reira tā mātou ‘i ‘āfa’i ‘i mua ‘i te fa’aterera’a hau fenua. »
Nō te peretiteni Moetai BROTHERSON, ‘ua ‘ite ‘oia i te fifi tā te māniania ‘e hōro’a ‘e te ta’ahoa ‘o te tahi pae ‘o te huira’atira ‘i teie mau pereo’o « car bass » ‘e ‘aore rā te mau ‘ārearea. ‘I tōna mana’o, ‘ia hi’ohia te ture purumu ‘e te māniania ‘upa’upa. ‘E’ere rā teie ana’e te rāve’a ‘a te peretiteni nō te pāruru ‘i tōna nūna’a ‘i mua ‘i te mau māniania huru rau.
« …Mana’o nei au, te rāve’a mātāmua, te ha’api’ira’a ia. Ha’api’i ‘i tā tātou mau tamari’i ‘i te fa’atura te tahi ‘e te tahi, fa’aho’i tātou ‘i ni’a i te parau ‘o te fa’atura. Ha’api’i ‘i te mau tā’atira’a’e ‘e tano ‘e fa’a’ohipa tā rātou mau rāve’a, tera rā, nā roto ‘i te fa’atura. Tītauhia ‘ia ‘imi te tahi mau vāhi tano nō terā mau huru ‘ohipa. Tītauhia ‘e fa’ature ‘i te tahi pae. Te vai ra ato’a teie mau manureva ‘e fa’a’ohu nei ‘i ni’a i te tahua manureva nō Fa’a’ā, ‘e fifi te reira nō te nūna’a ‘e noho nei ‘i terā mau pae. Tā mātou ia ‘e tuatapapa ‘e te Hau Farani, nō te mea nā rātou ‘e tī’ā’au nei te parau ‘o te mau manureva ‘e ‘ohu nei ‘i ni’a ‘ia Fa’a’ā….. »
Hau roa atu te ha’ape’ape’ara’a nō roto mai ‘i teie tā’atira’a ‘e te fa’atera’ahau ‘o te fenua, te parau ia ‘o te fifi ea nō roto mai teie mau māniania.
« (…) nō te mea, mea rahi ato’a te ta’ata ‘e ma’ihia ‘i muri mai teie mau ravera’a ha’apa’o ‘ore », te reo teie ‘o te peretiteni tā’atira’a Te Ora Hau, ‘o Maea TEMATUA.
« Parau mau, ‘e riro ato’a te reira ‘ei hōpo’i’a nō tatou ‘e te fare turuuta’a. Te fare turuuta’a, tātou ihoa ia. ‘Ia ‘imihia te rāve’a. ‘E toru fa’anahora’a rū tā mātou ‘e mana’o ra. ‘A tahi, ‘ia fa’atupuhia te tahi tōmite tuatāpapara’a pi’ihia « mission d’information » ‘i roto i te ‘āpo’ora’a rahi, ‘i ni’a ‘i teie tumu parau. ‘A piti, ‘ia tuatāpapahia te tāuira’a ‘o te fa’aturera’a ‘i te pae nō te terera’a pereo’o. Ia ‘ōpani-roa-hia te tahi mau fa’anahora’a pūai roa roto ‘i te mau pereo’o. Nehenehe tātou ‘e haere ‘i reira, mai te peu ‘e’ita te mau tā’atira’a « car bass » ‘e hina’aro ‘e auraro ‘i te mau fa’aturera’a. Tītau-ato’a-hia tātou, ‘ia feruri, ‘ia fa’atūea te fa’aturera’a ‘e vai rā ‘io tatou ‘i terā ‘e vai rā ‘i roto ‘i te tahi atu mau fenua », te pāhonora’a ‘a te peretiteni Moeatai BROTHERSON.
‘E tīa’i ā ‘ia, ‘ia tu’uhia teie tumu parau ‘i Tarahoi.
