Va’u matahiti teie nei ‘o Nadia rāua o Heifara, te ‘imira’a te rāve’a nō te ha’amaita’i ‘i te orara’a ‘o tā rāua na tamaiti, ‘o Noé, o tei ro’o hia ‘i te ma’i hiparoto. Ma’i e ‘ore ‘e māramarama maita’i hia ra tae mai i teie mahana. Orara’a hepohepo ato’a nō teie nau metua mai tei ha’apāpū hia nei ‘e Nadia Rameha, te metua vahine o Noé, ti’a fa’atere ato’a nō te ta’ati’ira’a « Entre Deux Mondes » i Ra’iātea. « Tano hoa ‘e parau e, ‘e’ere hoa te huma i te mea ‘ohie nō te hō’ē ‘utuāfare. Tā mātou fā, te tauturura’a ‘i teie mau ‘utuāfare, rātou ‘e ha’amā nei, ‘inaha te hi’o mata ‘ēhia nei rātou e te ta’ata ».
Te fifi o Noé, ‘aita te reo ‘e matara maita’i ra. Noa atu ā ra, te fa’aitoito nei ‘oia i te ha’api’i ‘i te pāpa’i, te tai’o, te nūmera ‘e te āparau nā roto ‘i te ‘apara’a e rau atu ā. Maoti ato’a ra te itoito o te mau metua. ‘Aita o Noé ‘e haere fa’ahou ra i te fare ha’api’ira’a. Nā te mau metua iho e amo ra ‘i teie hōpoi’a nā roto i te fa’anahora’a pi’i hia IEF. « ‘E’ere i te mea ‘ohie nō māua, ‘aita tā māua tamaiti ‘i ha’apa’o hia, haere hā noa ‘oia. ‘E mea nā ‘o māua i te fa’aotira’a e, ‘e tāpe’a iāna i te fare, ‘e nā māua iho e arata’i iāna i roto i tāna tau ha’api’ira’a » Heifara Rameha, te metua tane o Noé.
‘I te matahiti 2022, ‘ua fa’aō te ‘utuāfare RAMEHA ‘i roto i te ta’atira’a « Entre Deux Mondes », ‘e ‘īriti roa tu i te hō’ē pū ‘i Ra’iātea, nō te tauturu i te mau ‘utuāfare ‘i roto i teie fifi. ‘I pōrīnetia, ‘ua nūmera hia hau ‘i te 300 tamari’i ‘i ro’o hia i te ma’i hiparoto. Hō’ē ‘ahuru ti’ahapa i tāpura hia ‘i Ra’iātea.
Nō te 2 nō ‘ēperēra, te pi’i nei te ta’atira’a ‘i te mau ‘utuāfare ato’a, nā reira ato’a te huira’atira, te hau fenua ‘e te mau pū rave ‘ohipa, ia ‘ahu mai ‘i te ‘ū nīnamu nō te tāhō’ē i roto i te mahana i fa’ata’a hia nō te ma’i hiparoto. ‘E te 12 nō ‘ēperēra, te pi’i nei te ta’atira’a ‘ia ‘āmui mai tō Ra’iātea ‘i roto i tāna ta’urua ha’a-māramaramara’a, ‘e fa’a-‘ana’anataera’a ‘e tupu ‘i ‘Avera ‘i te fare heivara’a.
