Te rauota, te tōmāti, te mā’a fa’ano’ano’a, mau mā’a teie e tere maita’i nei ia tae te mau ‘ōro’a. Te fifi, ia tupu te vero ua, iti ‘e ‘aore roa atu, te mā’a tupu e hotu maita’i. I te ‘ōro’a noera ra, te vai ra te pū’ohu rauota i te mātete nō Pirae, mea iti roa rā. ‘Aita i roa’a i te feiā fa’a’apu nō Tahiti iti i te ‘ō’oti mai te tuha’a rahi ‘o tā rātou mau mā’a tupu, i te ravera’a a te ua pūai e topa nei ā i ni’a i te tino o tō tātou nei fenua, ‘āva’e hau i teie mahana. « ‘Oia mau, ua fifi rahi roa mātou i ni’a i te mau mā’a mai te rauota, te chou e te tōtoma, nō te vero ua. Ho’ē ā huru nō te mau fa’ano’ano’a mā’a matauhia i te ho’o i te mau ‘ōro’a, ‘aita roa a’e i teie matahiti nō te ua puai » te reo teie ‘o Kevin Lin, ta’ata fa’a’apu nō Tahiti Iti ‘e fatu pa’epa’e ho’ora’a mā’a i te mātete nō Pirae.
Rahi te hoani i tāua po’ipo’i ra, ua tāpapa i te mātete nō te ho’o ‘i te mā’a tupu, ia ‘āminamina tā rātou mā’a. »Te ‘ite nei au teie mau mā’a tupu nō te fenua, ‘e te ‘oa’oa nei, e tītauhia ia tātou e ho’o nā mua roa te mā’a nō tō tātou nei fenua » Béatrice Vernaudon, hō’ē ‘o te mau hoani.
‘I te mātete ‘o te mau mā’a tanuhia mā te ‘ore e fa’a’ohipa i te rā’au tupohe manumanu, te ‘ere ato’a nei te mā’a tupu. Ua ho’o te fatu toa i te tahi mau mā’a tupu ‘ē atu, ‘e, e roa’a i te tanu io tātou, mai te mau huru pipi « long » ‘e ‘aore ra te faito « ailé », te chicorée nō te fenua Peretīria, ‘aore ra, te chou kanak, mau mā’a tupu ‘ō tāna e fa’atianiani ato’a nei. « ‘E parauparau mātou i te mau hoani, e hōro’a atu ai i te tahi mau rāve’a, nafea e tunu i teie mau mā’a hotu ‘e te mau maita’i ato’a tā rātou e ‘āfa’i mai nō tō tātou tino, nō reira, mea tano te feiā fa’a’apu ia tanu fa’arahi atu ā i teie mau hotu nō te fenua » Gilles Parzy, fatu fare ho’ora’a mā’a hotu Bio.
« Te vai ra, te ta’ata fa’a’apu, te tu’u nei rātou i tā rātou mau tāmaru e nehenehe pa’i ia ‘e tupu maita’i tā tātou mau mā’a tupu. ‘O vau nei, ‘eita vau e tu’u nei teie mau ‘ohipa tāfare, mea au roa nā’u, ia hiti mai te mahana i ni’a i tā’u mau mā’a tupu » Heiata Stergios, vahine fa’a’apu nō Arue, te pe’ape’a ato’a nei i te mea, ia iti tā rātou mau mā’a tanu i te ho’ohia, topa ato’a ia te moni e ‘āpī.
E mai te mea, te fifi nei, hō’ē pae o te mau ho’oho’ora’a mā’a tupu, ua fa’a’oti te tahi mau utuutu mā’a e mono i te tahi mau mā’a tupu. « I tā’u fare tāmā’ara’a e fa’a’ohipa vau i te mau mā’a e tupu nei ia au i te tārena. E mono vau i te tahi mau hotu nā roto i te mau huru mā’a ato’a e vai nei i ni’a i te mātete » David Franck, ra’atira nō te feia utuutu mā’a ‘i te fare tāmā’ara’a Lotus.
Ia au i te nūmerara’a a te feia fa’a’apu, pae ‘āhuru i ni’a ‘i te hānere (50%) tā rātou mau mā’a tupu e ‘ino i te tau vero ua.
