Mea ora maita’i ‘o Kahikahara HOLMAN. Nō te mau taote, ‘e’ita ‘oia ‘e nehenehe fa’ahou ‘e hā’uti’uti ‘i tōna mau mero ‘i muri a’e ‘i tōna ‘ati. « Tétraplégic incomplète » te i’oa ia ‘i horo’ahia nō te faito ‘o teie taure’are’a. Te aura’a, ‘aita tōna uaua pū’oira’a ivi tua ‘i mutu roa. ‘Ua riro ‘ona mai teie te huru ‘i muri a’e ‘i tōna haerera’a ‘e hopu ‘i te miti ‘e tōna mau hoa. ‘Aita ‘i ha’apa’o, ‘ua ‘ōu’a ‘ona ‘i te vāhi pāpa’u, ‘i tōtē maita’i ai tōna upo’o ‘i ni’a i te one. Maoti te tauturu ‘o tōna mau hoa ‘i ora ai ‘i tāua mahana rā.
« ‘Oia, ‘e nehenehe mea pa’ari roa rā. Ua pa’ari te uaua, ‘e’ere ‘i te mea ‘ōhie nō te fa’ahaere te rima ‘i ni’a, nō te fa’ahaere ‘i muri », ‘e’ere tō Kahikahara ‘i te ri’ari’a mau ‘i te taime ‘a tupu ai teie ‘ati.
Nā roto ‘i teie fifi, ‘ua fa’ataime teie tuati fare inura’a ‘i tāna mau ‘ōpuara’a, ‘aita rā te mōrare ‘i topa. Aua’a te tauturu nō roto mai te feti’i ‘e te mau taote, ‘i roa’a ai ‘ia Kahikahara ‘i te hā’uti fa’ahou ‘i tōna rima ‘e te ti’a fa’ahou nei ‘i ni’a ‘i tōna nau ‘āvae.
« Paraura’a mai te taote nā mua mai (…) mana’o ana’e vau ‘eita ‘oe ‘e ta’ahi fa’ahou. Aua’a vau ‘i haere mai ai ‘i roto ‘i teie ‘āpo’o pape, ‘aore rā, ia tā’u vahine ato’a, haere māua ‘i roto te miti nō te fa’ahā’uti ia’u, nō te ta’ahi. Mea ‘ōhie roa ‘i roto ‘i te miti, ‘aore rā, ‘i roto te pape, ‘aita ‘oe ‘e ri’ari’a ‘e topa » te orara’a ‘o Kahikahara ‘i te pū Te Tiare.
‘E ‘itehia teie faito ‘i muri mai ‘i te hō’ē ‘ati purumu, aore rā, ‘ia topa hō’ē ta’ata nā te vāhi teitei. ‘E tupu ato’a teie fifi ‘ia ha’apē teie mero. ‘E piti huru tō teie ma’i, te vai rā te fāito pi’ihia « tétraplégic » tōna aura’a, ‘ua mutu te uaua pū’oira’a ivi tua ‘i ni’a ‘i te ‘a’ī, ‘eita te ta’ata ‘e hā’uti fa’ahou, ‘e vai tārava noa ‘oia. ‘I te pū Te Tiare, teie rahira’a feia ma’i teiaha ‘e fari’ihia ai. ‘I te matahiti 2021 rā, 24% ‘o te feia ‘i fa’ari’ihia, ‘e mau « tétraplégic » ‘aore ra « paraplégic ».
« ‘Ua mara’a teie nūmera ‘i te mātahiti 2022 ‘i ni’a ‘i te fāito 37%. ‘E mai te ‘āva’e tēnuare ‘e tae mai ‘i te ‘āva’e tiunu, ‘aita ‘i tāui, ‘aita ‘i topa te nūmera » ‘i te reo ‘o te ra’atira nō teie pū, Stéphane MILON.
« ‘E’ere te paraura’a e, ‘e mea paruparu a’e te nūna’a nō ‘ōteānia ‘i mua ‘i teie fifi. Tera rā, ‘ua ‘itehia ‘e mea na’ina’i a’e te ‘āpo’o ‘o te ivi, nā reira ‘i te uaua ‘o te pū’oi ivi tua ‘i te tomora’a. ‘Ia tano te uaua ‘i ni’a te ivi, ‘ōhie roa ‘ona ‘i te mutu », te pāhonora’a ‘a te taote Marc AMBRY nō te pū Te Tiare.
Te mana’o rā ‘o Kahikahara ‘e reva ‘i te fenua Farāni nō te fāna’o ‘i te tahi rapa’aura’a ta’a’ē ‘ei tauturura’a ‘iāna nō te tāmata ‘i te ho’i ‘i ni’a ‘i tōna orara’a tahito.