Fānauhia ‘o Kahaia Tapare i Tahiti nei, māmā marite, pāpā tahiti, ‘ua pa’ari teie nei tamahine i te motu nō Pora Pora e tae atu i te 15ra’a o tōna matahiti hou a ho’i mai ai i Tahiti nei a piti matahiti i teie nei. Mai tōna ihoa na’ina’ira’a tōna hina’arora’a e amo i te tōro’a pūrotu fa’a’ite ‘ahu. « I te ārea 2-3 matahiti, mea au nā na e ‘omo i tō’u mau tia’a poro teitei. ‘E’ita ‘ona e au ‘ia ho’o vau i tōna ‘ahu, hina’aro ‘ona nā na iho e mā’iti », i te reo ‘o Jessica, tōna metua vahine. « E moemoeā terā nō’u i te ravera’a i terā ‘ohipa », te mau ha’apāpūra’a a Kahaia. « ‘Ua riro te mau vahine mai ia Kate Moss, Naomi Campbell ‘e ‘aore rā Shalom Harlow ei hi’ora’a nā’u. ‘Ua rohi tūtonu rātou nō te tapae i te faito fa’ahiahia ».
Tau ‘āva’e i teie nei tō te mau metua ‘o Kahaia ha’amatara’a e ‘aitaui e hō’ē ta’ata tei ‘ite i tōna hōho’a i ni’a i te tahua Instagram. « ‘Ua ‘āva’e mātou i te paraparaura’a, e hi’o mai te mea e’ere teie i te ha’avare, ‘e’ita anei ‘ona e ani mai i te moni, ‘ia nehenehe e ti’aturi ia na », i te reo ‘o Jessica.
I te ‘āva’e nō ‘ātete tō Kahaia revara’a i New York arata’ihia e tōna metua vahine ‘inaha tei raro mai ‘ona i te matahiti ti’amā. I reira, ‘ua tu’urima hō’ē parau fa’aau ‘ohipa e te taiete The society. I tāua ato’a taiete ra te mau purotu mai ia Irina Shayk, Cindy Bruna, Kendal Jenner ‘e ‘aore ra Adriana Lima e ha’a ai. Mai reira, ‘ua tomo haere nā roto i te mau tīti’ara’a, i tōna ho’ira’a mai i Tahiti te fa’aarara’ahia atu e ‘ua mā’itihia ‘ona nō te ‘āmui atu i te Fashion Week nō Milan i te fenua ‘Ītāria, nō te fa’a’ite i te mau ‘ahu a Versace. « Mea maita’i roa e ha’amatara’a noa terā. ‘Aita ato’a tōna ti’a i ti’aturi te taera’a atu te parau ‘āpī », i te reo ‘o Jessica.
Hau atu, ‘aita ‘o Kahaia i rave a’e nei i teie ‘ohipa : « ‘Ua hora vau i ni’a i te niuniu paraparau e te ta’ata e ha’apa’o ra ia’u. Mea nā roto i te rāve’a natira’a tōna ha’api’ira’a ia’u i te mau tu’ura’a ‘āvae, te mau ‘ohipa e tano ‘ia rave ‘e ‘aore ra ‘eiaha… ».
Tae mai nei te tai’o mahana e reva i Milan, i reira ‘ua tu’urima hō’ē parau fa’aau e te ‘āma’a o te taiete The society i ‘Europa oia ho’i te taiete Elite. ‘Ua fa’ati’a mai ‘o Kahaia ‘aita ‘ona i taiā noa a’e nō teie fa’a’ite’itera’a mātāmua : « ‘Aue i te fa’ahiahia. Tāna noa i tāia, ‘ia ‘ata’ata vau ia haere au i ni’a i te tahua (‘opanihia te mau purotu e ‘ata), ‘ua fa’a’oroma’i au ! ». ‘Ua riro te reira ‘ei te’ote’ora’a nā te ‘utuāfare feti’i. « ‘Ua māta’ita’i mātou ia na i ni’a i te tahua natirara, ‘ua ta’i ato’a mātou. Fa’ahiahia roa mātou ia na. ‘Aita mātou i mana’o e ti’a atu ‘ona nō te fa’a’ite i te mau ‘ahu a te mau taiete tei tu’i te ro’o », i te paraura’a a Jessica.
Tei Paris ‘o Kahaia i teie mau mahana hou a ho’i mai ai i Tahiti nō tāna tau ha’api’ira’a e nō te fa’aineine i te parau tū’ite baccalauréat. I muri iho, te hina’aro ra ‘ona e haere i te ha’api’ira’a fa’aineine i te mau tōro’a e au i te mau fa’a’ite’itera’a ‘ahu. Te ti’aturi ato’a ra ‘ona e tāmau ā i te fa’a’ite’ite i te mau ‘ahu a Alexander McQueen ‘e Rick Owens.
