« Nō’u te faraoa farai pāni au roa a’e, terā ia e tu’u rahihia te pata, te here e rau atu a te mau ‘āno’i i roto ». E fa’aineine ‘o Rava i te faraoa farai pāni nō te tuha’a nō Bretagne : « Te vai ra tō’u hō’ē hoa nō taua tuha’a fenua ra. ‘Ua haere mai i’ō nei tau matahiti i teie nei e i muri iho ‘ua ho’i. I te 16 ra’a ‘o tō’u matahiti, ua reva atu vau i te fenua Farāni nō te tau fa’afa’aeara’a ha’api’ira’a. I te ‘oire nō Morlaix, tō’u tāmata-matāmua-ra’a i te faraoa farai pāni pi’ihia crêpe bretonne ».
‘Aita i mana’ohia e fa’ariro ‘o Rava i te tunura’a faraoa farai pāni ‘ei ‘imira’a nāna. ‘Ua haere ‘ona i te ha’api’ira’a ‘atu’atura’a tino. ‘Ua ‘iriti e piti piha ‘atu’atura’a mai’u’u. Aita ra te parau o te faraoa farai pāni nō Bretagne i mo’ehia iāna : « ‘Ua vai noa terā mana’ona’ora’a. ‘Ua rave au i te tahi mau mā’imira’a, ‘itehia mai nei ia’u hō’ē fare ha’api’ira’a i taua tuha’a fenua ra. Noa atu e ‘e’ere i te mea ‘ōhie, ‘aita vau i taiā a’e. E tāpura faufa’a pāpū ihoa ia, teie nei ra ‘ua fa’atae vau i tā’u ‘ōpuara’a i te hōpe’a ».
I muri mai hō’ē matahiti e te ‘afa fa’aineinera’a e ha’api’ipi’ira’a i te « Atelier de la crêpe », ‘ua ‘iriti ‘o Rava i tāna iho fare tunura’a faraoa farai pāni i Pape’ete. « ‘Ua ‘aro vau, ‘aita vau i tu’u noa a’e e ‘ua roa’a ia’u i te fa’atupu hō’ē ‘ohipa maita’i. ‘O vau ana’e te tamari’i nô te fenua i haere i teie ha’api’ipi’ira’a i taua pū ra.«
I roto i tāna fare tamā’ara’a, e tunuhia te mau faraoa farai pāni i te taime a fa’aau ai te hoani : « I te taime a pārahi ai te mau hoani, tei muri mātou i te umu. E’ere i te mea ‘ōhie. Tītauhia ‘oe e ti’a ‘oi’oi e fa’aitoito, faa’ohipa i te mā’a, te mau tāo’a e vai nei, tāmatamata ato’a i te faraoa farai pāni ‘āpī. Mai te peu ‘aita ‘oe e tāmata, ‘aita ato’a ia ‘ohipa ‘āpī i muri mai. ‘Ua hina’aro ana’e ‘oe, e manuia ihoa !«
« Fa’ahiahia roa vau iāna. Mea au roa nāna i te tunura’a i te mā’a, e mea maoro i teie nei tōna hina’aro-noa-ra’a i te ‘iriti i tāna fare tunura’a faraoa farai pāni. » Mai ta te metua tāne ‘o Rava e fa’ahiti ra.
E tāmau ā ‘o Rava i te fa’a’āpī i tāna tāpura faraoa e te ‘ōpua nei ‘oia i te fa’a’ohipa i te faraoa ota sarrasin.
