20 000 ta’ata nō Tai’arapu e haere nei i Pape’ete i te mahana hō’ē nō te ‘ohipa e ‘aore ra te ha’api’ira’a, 70% mea nā ni’a ia i te faura’o. Te fifi, ‘ōta’a noa te pere’o’o i ni’a i te purūmu, i te mau po’ipo’i ‘e i te mau ahiahi ato’a.
‘I mana’o ai te paoti taiete pahī ‘o Tuanua Degage ‘e tu’u i tōna pahī i ni’a i te rēni Pape’ete-Taravao. ‘Ua tupu te tāmatāmatara’a ‘i te mahana piti ra. I te hora 9 i te po’ipo’i te pahī i te fa’aru’era’a ‘i te uahu nō Pape’ete nō te fano nā tua, tere nā te pae hitia’a o te rā ia Tahiti, tīpae atu ai i te uahu nō Faratea, 1 hora 10 minuti muri mai. 32 maire e fa’ata’a’ē ra nā uahu ‘e piti, tāta’i piti tōna ātea ‘ia fa’aauhia i te uahu nō Vai’are. « …nō te miti ‘e te māta’i, maumau ri’i ihoa ia te tere…tāmatāmatara’a teie te piti nō te uahu ato’a, nō te hi’o e piri ānei teie pahī i te uahu, ‘e e aha te mau mea e fa’atanotano, nō te pārurura’a ihoa i te horopātete ‘ia pā’i’uma mai i ni’a i te pahī » te reo fa’ahiahia teie ‘o te tāpena pahī Apetahi Express, Fa’aora Faraire.
‘Ua tupu maita’i teie tāmatāmatara’a, te ‘ohipa i māuruuru hia ‘e te fa’aterehau Jordy Chan, ‘inaha taime ato’a teie nō te pāhono ‘i te tītaura’a ‘a te fa’aterera’a fenua. « Hō’ē fā rahi tā te fa’aterera’a, fa’aiti te mau pere’o’o i ni’a i te purūmu, nō reira teie ‘ōpuara’a, mea faufa’a nō mātou. ‘Ua fārerei mai te ‘ona ia mātou nō te ha’amau teie tere i Faratea, nā roto i tōna mau tere i raromata’i e toru taime i te hepetoma », te reo teie ‘o te fa’aterehau nō te mau utara’a Jordy Chan. « Te vai ra te mau ta’ata, ‘e’ere ‘i te mea ‘ōhie nō ratou nō te haere mai i’ōnei haere i Pape’ete ‘aore ra e haere i raromata’i…haere mai teie pahī i Tai’arapu, mea ‘ōhie nō ratou nō te ‘ōu’a i ni’a i teie pahī haere atu ai i te mau motu » Tuanua Degage te fatu pahī.
Hau roa atu, rāve’a ato’a teie nō te ‘āmuitahira’a a te mau ‘oire Tereheamanu i te huti i te ta’ata nō te pae ‘apato’erau ‘ia pou i te pae ‘apato’a nō Tahiti. « …e ha’amau ‘e e fa’ahaere ato’a mai te mau taiete, haere mai ‘i’ō nei nō te fa’ahotura’a i tō tātou nei fenua. Nō te hōro’ara’a i te huira’atira i te tahi ‘ohipa maita’i nō rātou nō te fa’aeara’a mai ‘i’ō nei » te pi’ira’a nō roto mai ia Anthony Jamet te tāvana nō Tai’arapu hitia’a o te rā.
Tārenahia te tere mātāmua ‘o Apetahi Express i te ‘āva’e nō ‘ātopa, 1000 farāne te tere Faratea-Pape’ete, 17 500 farāne te tītēti pahī nō te hō’ē tere haere ho’i mai nā raromata’i mā.
