I te 5 no mē i ma’iri a’e nei, ua ‘ī te fare ha’avāra’a i te ta’ata nō te haere mai e ha’apoupou ‘ia Maramatea Tuahu Bertholon, 26 matahiti tei ha’amauhia i ni’a i te tōro’a pāruru. ‘Ua ‘āmui mai te mau hoa e tae noa atu i te mau feti’i. » ‘Oa’oa rahi tō’u, ua noa’a tā’u parau tū’ite tuatoru tuha’a rua i te fare ha’api’iraa tuatoru, maōti te tauturu a Sémir Al Wardi, Alain Moyrand e tae noa atu ‘ia Raimana Lallemant. ‘Ua ‘āpe’e-maita’i-hia matou. Nō reira, te fa’aitoito nei au i te mau tamari’i mā’ohi e hia’ai ra e tītau i teie ti’ara’a i te fare ha’api’ira’a tuatoru. Fa’aotira’a maita’i roa. E ti’aturi rahi tō’u, e mara’a ia’u teie tōro’a. Nō te mea ‘ia mā’iti ‘oe ho’ē tōro’a hina’arohia e ‘oe, e hōro’a ‘oe i tō ‘oe tā’ato’ara’a. Hau roa atu, e tōro’a piri i te nūna’a, e rohi ‘oe nō te fenua, ‘ō tā’u ato’a ‘ia e ti’aturi ra i ni’a i teie tōro’a pāruru ‘o tā’u e amo ra. Nō reira, e rave i te ohipa, mea rahi terā e tīa’i mai ra. »
‘Ua noa’a ato’a te parau tū’ite tuatoru tuha’a toru nō te ture a Maramatea i te mau motu Antilles hou a’e i tāna parau tū’ite nō te tōro’a pāruru i te fare ha’api’ira’a teitei nō Paris. ‘Ua ‘ohipa na ‘oia i roto e 3 piha pāruru ‘i Pape’ete hou a ‘iriti ai i tāna iho.
