23% te mara’ara’a o te feiā i ro’ohia i te māriri ‘aita’ata i te fenua nei ia hi’ohia nā matahiti e 5 i topa a’e nei. Te tumu, te roa noa atu ra te pu’e tau orara’a o te ta’ata, te rahi noa atu ra te mau ma’i taimaha nā reira ato’a te mau hi’opo’ara’a tei fa’afāna’ohia i te ta’ata. Te fa’a’ite ra te pū’ohura’a a te pu tītorotoro CTC « i roto i te mau ‘utuāfare ri’iri’i te rahira’a o te feiā e pohe nei i te māriri ‘aita’ata ».
Te fa’a’ite ra te taote Teanini Tematahotoa, ra’atira nō te pū māiriri ‘aita’ata, « nā mua roa, te feiā e ro’o-pinepine-hia nei i te ma’i māriri ‘aita’ata, o te mau ta’ata ‘aita e ha’apa’o rahi nei i tō rātou ea. Rahi te pupuhira’a ‘ava’ava, te inura’a ‘ava, ‘aita te vahi ‘ohipara’a e tano fa’ahou ra ‘aore ra ‘ua urupu’upu’uhia. Vetahi ‘aita ‘i haere ‘oi’oi i te taote. Nō te mea, mea ātea te vāhi fa’a’eara’a i te fare ma’i, ‘aita rātou e ‘ite ra te faufa’a o teie mau āraira’a ».
8 hānere ti’ahapa feiā tei ro’ohia i te ma’i māriri ‘aita’ata i te fenua nei i roto i te ārea matahiti 2015-2019. 51% e tāne, 49% e vahine. 40% e ma’i māriri ‘aita’ata. Nō te taote Laurent Stein, te fifi, « ‘aita te ta’ata e māramarama maita’i ra », nāna e tī’a’au ra i te ‘ōpuara’a « tārona tere », rātou te tere ārata’i nei te mau vahine e noho ātea ra i te fare ma’i.
« I tō’u mana’o, ‘aita rātou e ta’a maita’i ra. Aita ratou e ‘ite ra te faufa’a ‘o teie mau āraira’a. ‘E’ita te ma’i māriri ‘aitītī e ‘ite-mata-hia i te ha’amatara’a. ‘Ia ‘ite-‘oi’oi-hia, e roa’a ato’a ia i te rāpa’au ‘oi’oi. E 9% a’e vahine te ora mai. ‘Aita e rapa’aura’a teiaha tō muri mai. 50 matahiti to ‘outou, a rave tā ‘outou mau rātio tītī ».
‘Ua ani te pū a te CTC i te fa’aterera’a fenua, ‘ia ha’amauhia hō’ē piha ‘ohipa nō te fa’a’ōhie i te mau mā’imira’a i ni’a i te ma’i māriri ‘aita’ata i te fenua nei.
