I mua i teie nei vero, ‘ua fa’aoti te Fa’aterehau nō te autaea’era’a ‘e nō te nohora’a e ‘ia ‘imihia hō’ē vāhi nō te feiā nohora’a ‘ore.
« 53 ta’ata o te pūhapa atu i roto hō’ē fare maeha’a i pīha’i noa atu i te vāhi pūhapara’a tumu tei fa’ati’ahia na i Fare Ute. I reira, te vai ra e 6 piha hopura’a pape ‘e haumitira’a, fatuhia ‘e te ‘oire nō Pape’ete« , ia au i te parau fa’aarara’a a te rurura’a hepetoma a te mau fa’aterehau.
‘Ua fa’ari’i ato’a te ‘oire nō Pape’ete ‘ia nehenehe ato’a te toe’a o te feiā nohora’a ‘ore, ti’ā’auhia ra e te tā’atira’a Te Tōrea, ‘ia haere atu e pūhapa i te fare tū’aro Maco Nena i Tipaeru’i. ‘Ia ineine nā pūhapara’a e piti, ‘ua ho’o te fa’aterera’a hau nō te autaea’era’a ‘e nō te nohora’a, 35 fāito ro’i fa’ehau « picot », 50 pē’ue ‘e 50 vauvau marū.
‘Ia ‘āmuihia, 130 ta’ata o te fa’aea atu nō teie tau vero, i roto nā pūhapara’a e 2. Nō te fa’atāmā’ara’a ‘ia rātou nā te hau fenua e amo i te mau ha’amau’ara’a.
« E toru mahana tei fa’anahohia nō rātou nō te pūhapara’a mai i te fare Maco Nena nei. Nā te huru o te reva e fa’a’ite mai ‘ia tātou, ‘ua oti, ‘ua hope tā tātou fa’anahora’a« , i te reo o Denis Hauata, rautī tōtiare nō te tā’atira’a Te Tōrea.
Tauturu i te feiā e fifihia
Nō te feiā o te fa’aruru i te fifi nā roto i te vero mata’i e nehenehe te « Te Rahu Ora (AISF) e tauturu ‘ia rātou ». « Nō te feiā e fifihia, e amo o Te Rahu Ora hō’ē tuha’a o te moni tārahu fare i te roara’a e 3 ‘āva’e », ia au i te fa’aterera’a hau fenua.
« ‘Ia nehenehe te pu nohora’a tōtiare OPH i te rave i tāna tuha’a, tītauhia hō’ē fa’aotira’a mai roto mai i te hau fenua« .
I te tahi a’e pae, te vai ato’a ra te mau nohora’a rū ti’ā’auhia ‘e te piha ‘ohipa tōtiare. « ‘Ua tu’urimahia hō’ē parau fa’aaura’a i rotopū i te fa’aterera’a tōtiare ‘e te pū OPH nō te tārahura’a 16 nohora’a i te vāhi pi’ihia Cité Grand », ‘ia au te pū’ohura’a a te rurura’a fa’aterera’a hau fenua.
Pū’ohura’a o te rurura’a fa’aterera’a hau fenua :
