Māoti teie fa’anahoraa i te fare ha’api’ira’a ‘utuāfare nō Poutoru, ‘ua tae mai te ‘aivana’a Romuald Macé i rotopū i te mau pīahi nō te vauvau ia rātou te huru o te tio, tōna orara’a, e nāfea i te fa’atapae i teie ‘ōpuara’a i tōna hope’a.
« I teie mahana, ‘ua fa’anahohia te tahi ‘ohipa ‘ia ‘ite a’e rātou te tahi atu ā fa’anahora’a nō te nūmera, nō te faitora’a, nā roto atu i teie ‘ōpuara’a a te DRM », i te reo ‘o Vairani Teriipaia-Maeta, ra’atira nō te MFR nō Taha’a.
Nā te ‘oire nō Pouturu, te fare ha’api’ira’a ‘utuāfare ‘e te piha tōro’a o te ohipa ravā’ai e pāturu ra i teie nei ‘ōpuara’a. Rāve’a nō te fa’amāhuta fa’ahou i te fa’a’amura’a tio. I te ārea matahiti 1970, ‘ua ora maita’i ‘o Taha’a i teie ‘imira’a faufa’a.
« Mai te mea, ‘ua tupu i terā tau, ‘aita vau e mana’o ‘e’ita e nehenehe e tuatapapā fa’ahou i teie nei matahiti. Te ti’aturi ra vau i ni’a i tā tātou ‘āpo’ora’a ‘oire nō te harura’a mai i teie mau ‘ōpuara’a. Ia riro teie mau ‘ōpuara’a ei tauturu i te tahi mau ‘utuāfare e fa’aea ra i roto i terā mau ‘ō’o’a », i te hi’ora’a a Joēl Hahe, tāvana tuha’a nō Poutoru.
Nā te tirotiro Polydora i ha’afifi i tāua tāpura ‘ohipa ra i terā ra tau. Mai reira, varavara roa te fa’a’amura’a tio ‘i Pōrinētia nei. E riro ra, nā roto i te mau mā’imira’a i ravehia e te ‘aivana’a Romuald Macé, ‘ua ‘itehia te rāve’a nō te tāta’i.
I te mana’o o tāua ‘aivana’a ra, « ‘ua manuia te mau mā’imira’a. I Patitifā nei, ‘o tātou ana’e paha tei ‘ite e pohe teie tirotiro ‘ia tu’uhia ‘ona e toru mahana i roto i te pape mā’aro. Te mau tio tā tātou i ‘īriti i teie nei mahana, e mau tio nō fa’aru’e noa a’e nei i tō rātou mau huero. Te mea ia e ‘itehia ra, mea hu’a te mā’a. Terā ra, tei ni’a noa ā i te faito 23 tarāma. I te fenua Farāni hō’ē tio 20 tarāma e tio maita’i ia ».
Te fā o teie ‘ōpuara’a, ‘ia fāna’o te huira’atira i te tahi ‘imira’a faufa’a nā rātou. Rāve’a ato’a terā nō te ha’amaita’i i te ‘imira’a faufa’a a te motu nō Taha’a.
