« Te ri’ari’a nei au nō tā’u mau tamari’i, tā’u mau mo’otua, nō’u iho ‘e tō’u mau hoa e ora ra ‘i ‘ō nei », te reo teie ‘o Manuia Tchong Tai, vahine tahiti e ora ra i te fenua Taratoni 16 matahiti i teie nei.
« Parau mau, mea fifi te orara’a i mua i teie mau huehuera’a. A tahi ra ‘ohipa fifi ‘a tupu ai mai teie te huru ». Tau mahana i teie nei tē tūtu’ihia nei te mau fare toa e te haere ‘ere ra te huira’atira i te mau mea ri’i. Te pe’ape’a ra ‘o Manuia Tchong Tai nō te mau mahana i mua nei : « ‘Ua ‘ite au ‘eaha tā rātou anira’a ‘e te turu ra vau ia rātou. Te vāhi rā e ‘aita vau e tū’ati ra ia rātou, 10 mahana i teie nei te fa’aro’o-noa-ra’a te pūpuhi, tūtu’i, tuōtuō. Mai monirē mai ā, mea ri’ari’a ».
I tōna a’e pae, te ‘ite ra ‘o Cyril Pito e te iti noa atu ra te mā’a, ‘aita rātou i ara i teie mau huehuera’a. « Mea rahi te feiā ‘āpī faito matahiti 14 e haere atu ai. Te uiui nei au, tei hea pa’i te metua ? Te vai noa ra te mana’o ri’ari’a ‘ahiri rātou e haere mai ai e tūtu’i i tō mātou vāhi nohora’a ‘aore rā ‘eiā i tō mātou pere’o’o. Mai te mea e roa’a i te hau fenua i te tāmarū mea ‘oa’oa ia nō mātou ».
Tau matahiti i teie nei ‘o Tamara Tsing-Tsing i te fenua Taratoni, ‘ua tamari’ihia ‘e ‘ua mo’otuahia. « Mea ti’a ‘ia pāruru ia mātou iho. ‘Ua fa’anahohia te tahi mau ‘ohipa i roto i te aroa. Mana’o ana’e vau, te hina’aro ra terā mau taure’are’a e ninā roa ia Nouméa ‘e fa’ahaere te ta’ata i rāpae i tō rātou fenua ».
Mai monirē ‘ua ‘ū’ana roa atu te mau huehuera’a. A mahana toru ra, ‘ua fa’aoti te hau nui e tu’u i te fenua Taratoni raro a’e i te tau ‘ōpanipanira’a. ‘Ua ha’apāpū te fa’aterehau nui mātāmua e tonohia te mau fa’ehau nō te pāruru i te uahu ‘e te mau tahua taura’a manureva nō te fenua Taratoni. Nō teie taime, 4 ta’ata tei fa’aru’e i rotopū ia rātou hō’ē mūt’oi ‘e rave rahi feiā tei pēpē. ‘Ua ‘ōpanihia te mau rerera’a i te tahua taura’a manureva nō Tontouta.
