Piri i te piti ‘āva’e i teie nei te hopera’a te tāta’ura’a heiva nui nō te hōrue, ‘ua tae i te taime e ‘īriti ia na i te hi’ora’a a te huira’atira nō Teahupo’o. « ‘Ua tīa’i noa na rātou e aha te taime e tātarahia ai tera a’e pa’epa’e, i teie mahana te tātarahia ra. Mea ‘oa’oa maita’i », i te reo o te tāvana tuha’a, ‘o Roniu Tupana-Poareu.
E parau rahi tō teie pa’epa’e, inaha mea nā roto i te ‘āmahamaha tei ‘ōpuara’a i te fāra’a mai. Hō’ē pae, te patura’a ia na nō te pāhono i te mau fa’aturera’a a te tōmite rahi nō te heiva tū’aro nui, i te tahi a’e pae te mau tā’atira’a e pāruru nei i te arutaimāreva. 547 mirioni farāne te tapura faufa’a i fa’ata’ahia e te hau fenua ‘e te hau nui nō te patura’a, tāmaumaura’a ‘e tātaratarara’a i te pa’epa’e.
« ‘Ua ha’amatahia teie pa’epa’e i te tātarahia, nā mua a’e ra i ni’a i te fenua mai te mau fare i patuhia i ni’a i te māhora Rose mai te 6 nō ‘ātete mai tei tīa’i-noa-hia na e te huira’atira », i te mau ha’apāpūra’a a te fa’atere nō te pū o te u’i ‘āpī ‘e te ‘ohipa tū’aro, ‘o James Cowan.
« ‘Ua anihia i te mau taiete e ‘īriti i te pa’epa’e ‘ia fa’a’ohipa i te mau rāve’a ato’a nō te pāruru i te arutaimāreva, eiaha te mau uru pu’a ‘ia pēpē ‘e ‘ia fa’atura ato’a te ‘āvei’a e ravehia e te mau poti », i te reo ‘o Paul Chastroux, ti’a nō te pū o te u’i ‘āpī ‘e te ‘ohipa tū’aro.
E vaihohia teie pa’epa’e i roto i te mau ‘āfata ‘āuri i Teahupo’o, vāhi nahonaho e te ‘ōhie ato’a ‘ia tae i te taime e hina’arohia ai nō te mau tata’ura’a.
