‘Ia ta’a i te hoa here, te māferara’a, te fa’a’inora’a, te rave ‘inora’a ‘a te mau metua ānei ‘e ‘aore ra te rave ‘inora’a i rotopū i te metua, mau tāpa’o teie te riro i te fa’atupu i te ‘ōnohi. ‘I roto i te ārea taime hō’ē hepetoma, maha (4) ta’ata tei ha’apohe ia rātou, ‘e te ha’ape’ape’a nei te ta’atira’a « SOS Suicide » ‘i tō rātou fāito matahiti, inaha, iau i te peretiteni ta’atira’a, Annie TUHEIAVA, ‘e toru ‘o rātou tei raro a’e i te piti ‘ahuru mā pae (25) ‘o te matahiti « …te fifi nei mātou, nō te mea, te ‘āpī noa atu ra teie nei tamari’i, te mana’o nei ato’a ‘e ha’apohe ia rātou. Terā, ‘e peu ‘āpī terā. ‘E te mau ta’ata pa’ari roa, hitu ‘ahuru mā va’u (78) matahiti te mana’o ato’a ra e ‘ōnohi. No reira, hi’o maita’i tā tātou mau tamari’i, parau vau i te metua. ‘A ara maita’i. ‘E paraparau, fa’aro’o tā ‘outou mau tamari’i. Nehenehe terā tamari’i ‘e tātara mai, ua fifi vau. Terā e rāve’a ri’i terā tā’u e ani ra i te metua, fa’a’ohipa, te tau’ara’aparau. »
Te tahi ato’a tumu ‘e riro i te ha’afifi te ferurira’a o te ta’ata, teie ia mau tahua ‘aitauira’a mana’o i ni’a i te natirara. Mai te peu te fa’ari’i nei te mau ‘aivāna’a i te maita’i ‘o teie mau fa’anahora’a ‘ia fa’a’ohipa maita’i ana’e hia. Te fa’aara ato’a nei ra rātou, mai te tahu’a mānava Nathalie COLIN-FAGOTIN, ‘e ia pūhara rahi ana’e teie mau ‘ohipa i ni’a ‘i te natirara, ‘e riro te tahi taime ‘i te tūra’i te feia, e ha’apohe ia rātou. « ‘E ō ato’a te parau ‘o te ‘ōnohi i roto i te parau ‘o te tahua ‘aitauira’a mana’o ‘o te natirara. ‘Eiaha e nāna ‘e fa’atupu te ‘ōnohi ‘o te ta’ata, teie nei ra, ‘e nehenehe ‘e fa’a’ū’ana atu ā te huru o te ta’ata e tei roto i te mā’ino’ino i te taime ‘a māta’ita’i ai teie tahua ‘aitauira’a mana’o. ‘E penea’e nā teie e tūra’i i te ta’ata ‘e rave i te ‘ohipa ‘ino i ni’a iāna. »
Te tau’aparaura’a, te ‘aitauira’a, te ‘āpe’era’a ‘a te hō’ē ‘aivāna’a ānei e ‘aore ra nā te ‘utuāfare iho, mau rave’a teie te riro ‘i te fa’aora i te hō’ē ta’ata. Mai teie metua vahine, tei fa’aruru i teie fifi i te ‘ahuru mā va’u (18)ra’a ‘o tōna matahiti, ‘e i teie mahana te ‘oa’oa nei, ‘aita i fa’atae i teie māuiui i vai na ‘i roto iāna, i ni’a i te ‘ōnohi. « Noa atu e mea ‘āua fa’ati hia ‘oe, ‘eita ihoa ‘e taui, ‘e hina’aro ihoa ‘oe e fa’aoti roa i tō ‘oe parau, ia ‘ore te māuiui….ia rave ana’e ‘oe i teie ‘ohipa, e’ita te roimata ‘e fa’a’ea i te tahe, nō te mea paha, e’ita ‘oe e hina’aro i te pohe…ua ‘ōpua tō’u metua vahine e tape’a iā’u i te fare ma’i manava. ‘Aita ‘i mara’a fa’ahou iāna ia ha’apa’o iā’u. ‘I teie mahana, ua māmā rūa’u hia vau, ‘e te ‘oa’oa nei au ‘i te ora. ‘I te ‘itera’a te mau maita’i o teie orara’a…’a tāpe’a maita’i, fa’aitoito. ‘Aita ‘e maita’i ‘i muri mai i te ‘ōnohi. »
Nō te arai atu ā i teie fifi o te ‘ōnohi, te ti’aturi nei te ta’atira’a « SOS Suicide » e ia ha’amau hia te hō’ē pū hi’opo’ara’a o te ‘ōnohi. Pū tei feruri hia e ha’amau i ta’aone i te pū o te ea, te araira’a e te rapa’aura’a i te ma’i manava. Te vāhi fifi, ua tape’a hia teie ‘ōpuara’a i teie taime.
