E’ita ‘e ‘ore rave rahi ‘o ‘outou ‘e ‘ua parai-hia te mata ‘i te hinuhinu ‘o te moni ‘i topa ai ‘outou ‘i roto ‘i te hō’ē herepata. Te ‘ohipa ia ‘e tupu ra ‘i ni’a ‘i te natireva. ‘I te taera’a mai ihoa hō’ē poro’i ‘e ua tano ‘outou ‘i te hō’ē tino moni fa’ahiahia : ‘oi’oi atu ra ia ‘i te tāpapara’a ‘i teie faufa’a. ‘A tae ho’i e, ‘e tōtōāra’a ia tō muri mai. ‘I te reo ‘o te ra’atira ‘o te ‘aua mūto’i ‘a te hau nō Pape’ete ‘e tī’a’au nei ‘i te mau ‘ohipa pi’o ‘i nia ‘i te natirara : ‘Ia fa’aruru ana’e hō’ē ta’ata ‘i teie huru fifi, ‘aita roa atu teie e tae i mua ia ratou.
Te a’o fa’ahou nei ‘o Timiona Hapaitaha’a ‘i te ta’ata, ‘ia vai ra “tītauhia ‘ia feruri maita’i, ‘e parau mau ānei ‘aore ra ‘aita mai te peu ‘aita rātou ‘i pāpū, ‘a ani atu ‘i tā rātou mau fēti’i. I ria ‘ōna ‘e pāpū ai ‘ōna ānei ‘aore ra ‘aita.”
‘Are’a ‘i Taraho’i, ‘aita te mau ti’a mana ‘o te fenua ‘i huna noa ae ‘i tō rātou mana’o pe’ape’a ‘i mua ‘i teie mau tōtōāra’a ‘e fa’aruru-hia ra ‘e te huira’atira. Te rahira’a ‘o te taime, ‘e tāpapa tino roa teie mau ta’ata ‘i teie mau ti’a nō te ārata’ira’a ‘e nō te tauturura’a ia rātou ‘i mua ‘i teie mau herepata.
Ua fa’a’ite mai te ti’a mā’iti-hia nō te pupu Tavini Huira’atira Tematai Legayic ‘i tōna mana’o pe’ape’a ‘i mua i teie mau ‘ohipa tano ‘ore, “pinepine vau ‘i te ha’apāpū ‘i mua ‘i tō tātou nuna’a, ‘e mau fa’anahora’a ha’avare, ‘aita vau ‘i ‘ite, nā vai ‘e rave nei ‘i tō’u nei hoho’a no teie mau ‘ohipa ha’apa’ora’a ‘ore.”
No te ti’a mā’iti nō te pupu Tapura Huira’atira Tepuaraurii Teriitahi, tītauhia tātou ia vai ara i mua i teie mau herepata “mai te peu ‘e anihia ia ‘outou ‘i teie mau anira’a, ‘e hōro’a mai te tahi tuha’a moni nō te ha’amatara mai ‘i te hō’ē tuha’a moni rarahi atu, e ha’amoemoera’a teie, e rorehia ‘outou, ‘eiaha roa atu ‘e ‘āfa’i ‘i teie tuha’a moni, mea pāpū, ‘aita teie ha’amoemoera’a e tupu.”
Te pi’ira’a ‘a te ‘aua mūto’i ‘a te hau : ‘Ia topa noa atu hō’ē ta’ata ‘i roto ‘i te ho’e herepata. Nā mua roa, ‘ia tīti’a maita’i ‘oia ‘i te feiā ‘o tāna ‘e ‘āparau ra ‘i ni’a ‘i te rāve’a ‘o te natirara ‘e mai te mea ‘ua tōtō’āroa-hia ‘ōna : ‘a ha’ape’epe’e ia ‘i te fārerei ‘i te mau mūto’i ‘e nā te ture ‘e ha’apa’o roa atu ‘i teie ‘ohipa.
