‘Ia faa’auhia i te mau matahiti i mā’iri a’e nei, iti te ta’ata tei ‘āmui mai i teie nei po’ipo’i monirē. Teie ra, ‘ua vai noa te mātete fenua i ni’a i tāna fā, oia ho’i te ha’afaufa’ara’a ia i te fa’a’apu i roto i tōna raura’a. Nō teie haerera’a ‘ua huru rahi mai te feia fa’a’ite’ite, ‘ua hopoi mai te mau rā’au tanu, te mā’a hotu, te mau tiare, te mau ‘ānimara e tae noa atu i te mau mā’a i tāvirihia. « ‘Ua ha’amata a’e na te ta’ata i te ‘ohi i te mā’a, ‘aita ā i matara atu ra, ‘ua ha’amata a’e na rātou i te tāpa’o », i te reo hō’ē vahine fa’a’apu.« I roto i te mau fa’anahora’a mai teie te huru mea tere maita’i tā mātou mā’a. I te teie hepetoma ia e hi’o atu ai eaha te huru ? ‘Ia mana’o ana’e vau e manuia maita’i. »
Te orihaere nei te mau ta’ata nā roto i te mau aroa. « ‘Ua rau ato’a pa’i te mau mā’a, te mau tiare ‘e ‘ua rau ato’a te moni », i te mana’o ‘o hō’ē hoani.
Te tauto’ora’a a te piha rautea, ‘ia ora te nūna’a i te mau hotu nō te fenua nei mā te fa’a’ohipa i te mau mā’a hotu nō te fa’atāmā’a i tā tātou mau tamari’i haere ha’api’ira’a. I teie fa’anahora’a, e ha’apūaihia i te tāvirira’a i te mā’a. « ‘Ua rau te mau mā’a tā’u i ‘itehia iho ra ‘e rahi atu ai te mau ta’ata e tāviri ra i te mā’a mai te re’a, te tuvava, te ua’a tiare anei ‘e te painapo. ‘Ua paraparau vau i te fa’aterehau nō te fa’a’apu, mai te peu e rahi mai tā tātou mau mā’a hotu tei tāvirihia ‘a tāpe’a atu ia tō te ara. Terā te fā, fa’aiti tō rāpae, tu’u mai tā tātou. Hō’ē hi’ora’a terā. »
Te peho o te ‘ānimara tei haere-rahi-hia e te mau tamari’i : te pūa’a, te pūa’a niho, te moa e te rāpiti tei fa’a’oa’oa ‘ia ‘aiū mā.
![](https://i2.wp.com/www.tntv.pf/tntv/wp-content/uploads/2023/10/lapin-1024x576.jpg?ssl=1)
![](https://i1.wp.com/www.tntv.pf/tntv/wp-content/uploads/2023/10/lapin-1-1024x576.jpg?ssl=1)
![](https://i2.wp.com/www.tntv.pf/tntv/wp-content/uploads/2023/10/canards-1024x576.jpg?ssl=1)