Mai te matarara’a tōna mau ‘ūputa i te 2 nō tētepa matahiti 2022, 230 ‘ūri ‘ōvere tā teie pū nō Puna’auia i fāri’i. Ia tae atu rātou i te SIGFA, e faitohia rātou, tāpa’ohia tō rātou fāito ‘e mai tei hea ‘oire rātou i te ‘āfa’ira’ahia mai, Puna’auia anei ‘e ‘aore rā Pā’ea.
« E ti’ara’a mana tō te ‘ūrī, fa’ahepohia mātou i te fa’a’ōhie i tōna orara’a. Te vai ra ihoa te tahi fa’aturera’a i Pōrīnetia Farāni i ni’a i te orara’a o te ‘ānimara, tā mātou ia e fa’atura nei. I teie nei, rāve’a ato’a teie nō te tāmārū i te ‘ūrī, te aura’a mea ‘ōhie a’e i te ravera’a a tā mātou mau rave ‘ohipa, ‘e’ita rātou e hōhonihia », i te reo ‘o Matairii Maire, fa’atere nō te pū ‘atu’atura’a ‘ūrī SIGFA.
I tāua pū ra, e ‘atu’atuhia te mau ‘ūrī mai tā te fa’aturera’a e tītau ra e tae atu i te taime a fa’a’amuhia rātou e te mau ‘utuāfare. « I ni’a i te rahira’a ‘ūrī tā mātou e ha’apa’o nei, tai’ohia 70% o rātou tei fa’a’amuhia. Te ‘āfara’a o rātou ‘ua ho’i ia i roto i te ‘utuāfare tumu. ‘Ua ‘itehia ia mātou tō rātou mau fatu. Te tahi ‘āfara’a e ‘utuāfare ‘āpī ia. Te toe ‘ā, 10%, ‘ua ha’apohe-roa-hia ‘e te tahi atu mau ‘ūrī tei i’ō nei noa nei ā », i te mau ha’appūra’a a Matairii Maire, fa’atere nō te pū ‘atu’atura’a ‘ūrī SIGFA.
Nō te ha’amaita’i atu ā tā rātou ‘ohipa i ni’a i te araira’a o teie fifi o te mau ‘ūrī ‘ōvere, te ‘ōpua ato’a nei te mau rave ‘ohipa a teie pū e tere i roto i te mau fare ha’api’ira’a nō Puna’auia, nō te ha’amāramarama i te mau tamari’i i ni’a i te ‘ohipa tano ‘e tano ‘ore ‘ia fa’a’amu i te ‘ūrī.
