Tītauhia na mero hi’opo’a e 7 e fāito i te mau meri i tu’uhia i mua ia rātou. Te reira meri e tōna ta’a’ēra’a. E hi’o nā mua rātou i te ū, mea nehenehe anei ‘ia hi’o atu te mata. Haere atu ai i ni’a te faito ‘e te monamona.
« Ia tāmata ‘oe te meri, e nehenehe ‘oe e ‘ite ‘eaha te mau tiare i tauhia e te manu », terā te ‘ohipa fa’ahiahia tā’u e ‘ite ra i roto i teie huru tata’ura’a », i te reo o Faatuarai Roopinia, ra’atira mono o te piha rautea. « E tāmata mātou te meri, te vai ra anei te hāu’a o te mau mā’a hotu mai te tāporo ‘aore rā te accacia » te mau mana’o ‘o Heiva Faatauira, rautī nō te tā’atira’a SPG Bio Feti’a. « Te vai ra te meri e mea fa’ahiahia i roto i te vaha, te vai ato’a ra vetahi ‘aita vau i au maita’i », i te reo ‘o Krisztian Lovas, ra’atira tunu mā’a.
I te fenua nei, 60 huru re’a i tāpa’ohia e te fa’aterera’a nō te fa’a’apu. Nō teie nei tata’ura’a fa’anahohia e te tā’atira’a Apis Pōrīnetia, nō Tahiti ‘e nō Matuita mā te meri. ‘Ua hi’opo’ahia rātou, te pāhono nei rātou i te mau fa’aturera’a.
I te hi’ora’a a Valérie Antras, nō te fa’aterara’a o te fa’a’apu, e tano e ha’amaita’i atu ā te ture. « Rāve’a nō te pāruru i te feiā fa’a’amu meri e te mau ‘aimamau nō te mā’a i roto i te vaira’a. ‘Ia ho’o tātou i te meri, mea hāmanihia ia e te mau manu ‘e tei ‘ore ‘i ‘āno’ihia ».
Nō reira, te tamau noa ra ā te mau uiuira’a mana’o nō te fa’aoti i te mau ‘ohipa e tano e tu’u i roto i tāua ture ra. « Te rahi noa atu ra te mau mā’a tātīhotahia, e nehenehe te ta’ata i te mana’o e meri mau teie. Hō’ē ā tōna huru i paraihia i ni’a i te tāpū faraoa. E hape ihoa te ta’ata. ‘Ia hi’ohia te tārifa, mea moni a’e terā i te meri. Mea ti’a ‘ia vai ara », i te reo ‘o Olivier Vergnet, pāpa’i parau nō te tā’atira’a Apis Pōrīnetia.
Tai’ohia 77 ta’ata fa’a’amu meri i te fenua nei. I teie nei mahana, ‘ua ‘iritihia te tata’ura’a i te feiā fa’a’amu meri avatau. Hō’ē o rātou tei manuia i roto i teie nei tata’ura’a, ‘o Luc Bassez tei haru i te feti’a ‘auro 2024 e tāna meri Tahitian Bees. Tei ia Linnea nō Hiva Oa, te feti’a ‘ārio ‘e te feti’a veo ia Vaioma nō ‘Ārue.