Fa’atupuhia i te matahiti 1997 nō te taime mātāmua roa, i te matahiti 2003 i te fa’atupu-hōpe’a-ra’a-hia. I teie haerera’a, ‘ua tarēnahia teie ta’urua ‘ei ‘ōro’a ‘ōpanira’a i te heiva tū’aro nui. E tupu te reira i te aroā Pomare, ‘i Pape’ete.
Nō teie nei ta’urua te tīa’ihia ra 2000 taure’are’a ‘e 11 pere’o’o fa’anehenehe. « Nā te mau taure’are’a e fa’a’ite atu i te parau fa’ahiahia o tō tātou fenua, hō’ē ā ato’a te parau o te fenua i roto i tô rātou ‘oire ‘e te tahi mau tū’aro mā’ohi tā tātou i ‘ite, ‘ei fa’a’itera’a i te ao ato’a nei e, ‘ua ‘ite ato’a tātou i te parau nō te tū’aro », i te reo ‘o Patricia Teriiteraahaumea, peretiteni nō te ‘āmuitahira’a Tama Ti’a Hou.
Fa’ateniteni i tō rātou ‘āi’a, te ‘ohipa ia e fa’aineinehia nei e te mau taure’a, a 5 hepetoma i teie nei. Rāve’a teie nō te tā’amu i tō rātou hīro’a nā roto i te tū’aro ‘e te ‘ori. « Vāna’a i tō ‘āi’a », te tumu parau ia i tāpe’ahia mai.
« Tāpa’o fa’a’ite terā e, nā te ‘oire tāta’i tahi e ‘imi i te rāve’a ia mapiha mai te ‘ā’ai tā rātou i mana’o e mea maita’i e ‘āfa’i i ni’a i te tahua ‘e o tā rātou i fa’aineine ato’a », te mau mana’o ‘o Taoahere Maono, te ti’a fa’atere o te Tama Ti’a Hou.
E tupu te Hiva Vaevae ‘Ārearea i te tāpati 4 nō ‘ātete mai te hora 6 i te ahiahi i te aroā Pomare.
