I roto ‘i te ‘oire nō Pape’ete, rave rahi te mau aroa ‘e ‘ua ha’amauhia te mau tāviri hōho’a nō te ha’apa’ari te hi’opo’ara’a, arata’ihia teie tāpura ‘ohipa e te ‘āua mūto’i iho ‘a te ‘oire mai te matahiti 2022 ra. ‘Ua riro teie mau tāviri hōho’a ‘ei mata hi’opo’a nō te mūto’i ‘i ni’a ‘i te huira’atira ‘e pou mai ‘i Papeete : te mau ‘ati porōmu, te ‘eiāra’a, te mau ‘ohipa ‘i’ino, te ‘ati ‘auahi e te vai atu ra. Te vāhi faufa’a, ‘e haruharuhia te mau hôho’a 24 hora ‘i ni’a ‘i te 24.
Te nā’ō ra te ra’atira ‘o te mau mūto’i ‘o Roger Larmy, « ‘i te mau mahana toru ato’a, ‘ia ha’aputuputu ana’e te feia ‘āpi ‘i roto ‘i te ‘oire nō Pape’ete, tei roto mātou ‘i teie pū hi’opo’ara’a, ‘e ‘ia tupu ana’e te fa’ahuehuera’a, ‘oi’oi noa mātou ‘e tāpapa ‘i te vāhi tei reira te tupura’a teie fa’ahuehuera’a. Māoti teie mau tāviri hōho’a ‘oi’oi ato’a mātou ‘e ‘ite ‘o vai te ta’ata tei faatupu ‘i teie fa’ahuehuera’a. Maite te peu ‘e horo rātou, ‘e roa’a rātou ‘ia mātou. Te vai ra ‘e taui tō rātou ‘ahu ‘aore ra te tāupoo, mā te mana’o ‘eita rātou ‘e ‘itehia. E mea hape roa, nā te mau tâviri hōho’a ‘e tauturu ‘ia mātou ‘i te ‘imira’a ‘i teie mau taure’are’a faahuehue ».
I Tahiti nei, ‘e 5 ana’e oire ‘e fa’a’ohipa ra ‘i te mau tāviri hōho’a. ‘I roto ‘i te tere ‘o te fa’aterehau nui Darmanin tāne, ‘ua fa’aha’amana oia ‘e te vai ra hō’ē tāpura faufa’a ‘i fa’ata’ahia nō te tauturu i te mau ‘oire ‘e tītau ra ‘i teie rāve’a, nō te ha’apa’ari ‘i te mau hi’opo’ara’a, ‘ei hi’ora’a ‘i te tau nō te Heiva Nui nō te hōrue ‘e tupu ‘i te fenua nei ‘i te matahiti 2024.
« hō’ē matahiti ‘i teie nei tō’u fa’aarara’a i te mau tāvana ato’a ‘e te vai ra te moni nō te fa’afāna’o ‘i teie mau mo’iha’a hi’opoara’a. ‘Aita hō’ē pu’e parau anira’a ‘i fa’ataehia mai. Tā’u ia ‘e fa’aara fa’ahou ra ‘i te mau tāvana nō Pōrīnetia, ‘e fa’anao rātou ‘i te moni nō roto mai ‘i te hau nui nō te tāmaumaura’a ‘i teie mau tāviri hōho’a », ‘i te reo ‘o te fa’aterehau nui Darmanin.
Fa’anahora’a fāri’i poupou-maita’i-hia ‘e te tāvana nō Tai’arapu tō’o’ā ‘o te rā : « ‘aita mātou ‘i ara ‘i teie ‘ohipa, nō reira ‘e fa’aineine mātou ‘i te mau anira’a nō teie tauturu ».
‘O Pape’ete te ‘oire mātāmua ‘i fa’a’ohipa ‘i teie mau moiha’a hi’opo’ara’a, 10 mirioni farāne te tāpura ha’amau’ara’a nō te tāmaumau ‘i teie mau tāviri hōho’a, 4,6 mirioni farane amohia ‘e te Hau Nui. Nō teie taime, 35 tāviri hōho’a tei ha’amauhia ‘i roto ‘i te mau aroa nō Pape’ete, ‘e mara’a atu ā ‘i ni’a ‘i te faito 54 mātini ‘i teie mau taime ‘i muri nei.
«Parau mau, tītauhia ‘ei tāpura faufaa, ‘eiaha noa nō te ho’ora’a mai, nō te fa’atere ato’a ra, ‘inaha titauhia ‘e fa’a’ohu teie mātini », ha’apāpūra’a ‘a Roger Lamy.
‘I te ‘oire nō Pira’e, 39 tāviri hōho’a tei ha’amauhia mai te matahiti 2019 ra, 93 mirioni te tāpura ha’amauara’a. Tapura faufa’a teiaha, ‘aita ra tōna ‘e tāi’o, ‘inaha te fā, ‘o te pārurura’a ia ‘i te huira’atira’a. ‘E 8 mirioni te moni tauturu i fa’anaohia nō roto mai i te pū fa’aterera’a ‘e ara’i ra ‘i te mau ‘ohipa ‘i’ino ‘i te fenua nei.
