I Nuku’alofa i ni’a i te rahira’a o te mau mēnema, te ti’a mai ra te mau hōho’a o te ta’ata i mā’iri. Rāve’a nō te fa’aha’amana’ora’a ‘iana ‘e tōna ato’a huru i tōna orara’a. Ta’ata pāpū, ta’ata ‘ārearea anei, te vai ato’a ra, tei mā’iti i te hōho’a o Iesu i tōna iho.
Te tāmā nei te ‘utuāfare Kula i te mēnema ‘o Soane, tei pohe i te piti ahuru mā hō’ēra’a o tōna matahiti. E ti’ahia hō’ē matahiti tōna mo’era’a. « I’o nei noa e ‘itehia ai teie nei peu. I mūta’a ra ‘e’ita te hōho’a e hutihia mai teie te huru… i teie nei, ‘ua nu’u te tau… ‘Ia tere iho mātou nā ni’a i te porōmu, mai te huru ra tei roto ā ‘ona i teie ao », i te reo ‘o Senitila Kula, te tuahine.
15 tauatini farāne hō’ē hōho’a mai teie te faito e te mana’o ra te ‘utuāfare e taui iana i te mau matahiti ato’a, ‘eiaha te parau o taua taure’a ‘ia mo’e. ‘Ua ‘āmui mai te mau tuahine e tua’ane nō te fa’anehenehe i te mēnema, pēni haere, tāui ato’a te tiare. Tāpa’o fa’a’ite ato’a terā e ‘ua hope te tau hevara’a.« ‘Ia fa’aru’e te tua’ane, te tuahine, te metua vahine ‘e ‘aore te metua tāne, fa’ahepohia mātou ‘e ‘ahu i te ‘ū ‘ere’ere hō’ē matahiti tā’ato’a. ‘Ia hope te matahiti mātāmua, e nehenehe ai te ‘utuāfare e tātara i terā mau ‘ahu ‘ere’ere », i te mau ha’apāpūra’a a Kalolaine Kula.
Nō teie nei ‘ōro’a, i’ō nei te ‘utuāfare Kula e tāmā’a ai nō te fa’aha’amana’ora’a i te parau ‘o Soane.
I teie nei mahora hunara’a ma’i, te vai ra te mau hōho’a tei tāpo’ihia ‘eiaha ‘ia marau ‘oi’oi… Tei raro vetahi i te ravera’a a te tau, a te ua ‘e te mata’i, toe noa mai ia te ‘apa’apa. Mea rahi ato’a te mau hōho’a e huti-‘āpī-hia nō te ‘ōro’a fana’ura’a anei, e au ato’a ra i te rāve’a a te mau ‘utuāfare, moni roa nō vetahi o rātou. I Tonga mā, tei raro roa te moni ‘āva’e ‘ia fa’aauhia ia Pōrīnetia.
