45 metera i te roa, 25 tāne i te taiaha, te ineine hope roa mai ra teie nei ‘e’a turu e fa’atū’ati ra ia Tiirahi ‘e Fau’oro. ‘Ia au i te mau tohura’a, e matara i te ‘āva’e ‘eperēra. Te ta’a’ēra’a o teie e’a turu, ‘aita e pou i raro a’e.
« Te toeri’i ra te tahi mau tāpura ‘ohipa hou ‘a ‘iriti ai i te ‘e’a turu, mai te tāpirira’a i te ‘āuri, te tīmara’a ‘e te ha’apa’ārira’a », i te reo o te fa’aterehau Jordy Chan.
« I teie nei mahana, te ‘itehia atu ra tōna hōho’a ‘e ‘ua ha’amatahia i te tu’u i ni’a i tōna vaira’a. ‘Ua riro te reira ‘ei ‘oa’oara’a nō mātou te ‘itera’a te nu’ura’a o te ‘ohipa i mua. Aua’e ato’a teie nei hōrue nui i vitiviti mai teie ‘e’a turu ‘āpī i te hamanihia i Teahupo’o nei », i te reo o Tetuanui Hamblin, te tāvana nō Taiarapu to’o’ā o te rā.
‘Ia tai’ohia, 13 ‘āva’e nō te fa’aoti hope roa i teie ‘e’a, ‘eiaha ra 16 mai tei fa’aauhia na. E pāruru ‘oia i te haere ‘a a te ta’ata i te mau vāhi hōruera’a, ‘eiaha noa ra. ‘Ua ha’apāutuutu-ato’a-hia nō te fa’aruru te ravera’a a te huru nō te reva.
« Mea faufa’a roa i te patu hō’ē rāve’a pāpū nō te fa’aruru i te mau vaipu’e e tupu nei i te 100 matahiti ato’a », te mau ha’apāpūra’a a te fa’aterehau nō te mau patura’a.
Te tāpura faufa’a tei fa’ata’ahia nō te patura’a o te ‘e’a turu ‘āpi : 390 miriōni farāne. ‘Ia oti teie ‘e’a turu ‘āpī e tātarahia terā mea tahito.
