I muri mai ‘ia Thomas Pesquet, te hina’aro ato’a ra te mau tamari’i nō te fare ha’api’ira’a La Mission, e tītau ‘ia Francis Cabrel nō te haere mai e fārerei ‘ia rātou. I ni’a i te otora’a o te hīmene « Je l’aime à mourir », ‘ua tu’uhia mai te mau ta’o nā roto i te reo tahiti.
« ‘Aita roa atu mātou i huri i te hīmene « Je l’aime à mourir » nā roto i te reo tahiti. ‘Ua pāpa’i mai ra mātou hō’ē tuha’a nā roto i te reo tahiti, teie e fa’a’ite nei i te tā’amura’a o te mau tamari’i e tō rātou reo », te mau ha’apāpūra’a a Miranda Taputuarai, ‘orometua piha CCA.
Te nā’ō ra terā tuha’a iti : « Mātou teie te tama mā’ohi, te hīmene nei mātou tō here nō tō’u reo. Mātou teie te tama mā’ohi, puhi haumarū nō tō hana, nō tō’u reo, nō tō’u reo, reo mā’ohi ».
Tāpura ‘ohipa tei te o atu i roto i te tārena a te mau piha faito CCA. E 2 hora ‘e te ‘āfa tei fa’ata’ahia nō te ha’api’ira’a i te reo i te hepetoma hō’ē. Hau ‘i te hīmene, e ha’api’i ato’a taua mau tamari’i ra i te hā’uti i te ‘ukulele i teie pehe.
I te 28 nō ‘ātopa ‘o Francis Cabrel e hīmene ai i ni’a i te tahua Tō’atā.
